დარწმუნებული ვარ, რომ კახა კალაძე თავისი თანამედროვე, საინტერესო მიდგომებით, აუცილებლად დაატყობს ხელს თითოეული თბილისელის ცხოვრებას, – ამის შესახებ საქართველოს პრემიერ–მინისტრმა გიორგი კვირიკაშვილმა „ქართული ოცნების“ თბილისის მერობის კანდიდატად კახა კალაძის წარდგენისას განაცხადა.
გიორგი კვირიკაშვილის განცხადებით, თბილისის მერობა კახი კალაძისთვის კიდევ ერთი გამოწვევაა. პრემიერი დარწმუნებულია, რომ კალაძე ამ გამოწვევასაც ღირსეულად გაართმევს თავს.
„დღეს, უკვე ოფიციალურად მინდა წარმოგიდგინოთ ჩვენი პარტიის ,,ქართული ოცნება – დემოკრატიული საქართველოს“ კანდიდატი თბილისის მერის პოსტზე კახი კალაძე.
კახი გახლავთ არა მხოლოდ ჩვენი პარტიის ერთ-ერთი ყველაზე გამორჩეული ლიდერი, არამედ ის გახლავთ ჩვენი საზოგადოების ერთ-ერთი ყველაზე გამორჩეული წევრი.
სადაც იყო კახი კალაძე, იქ ყოველთვის იყო გამარჯვება, იქ ყოველთვის იყო წარმატება.
მე დარწმუნებული ვარ, ასე იქნება მომავალშიც. კახი ყოველთვის გამოირჩეოდა საქმისადმი ბოლომდე ერთგულებით, ის არის ენერგიული, ჩვენი ქვეყნის მოყვარული ადამიანი, ის არის ძალიან კარგი მეოჯახე, მას არასოდეს უღალატია პიროვნული თავისუფლების პრინციპისთვის.
კახის ყოველთვის ჰქონდა გამორჩეულად აქტიური სამოქალაქო პოზიცია და ის ყოველთვის იყო არა მხოლოდ გამორჩეული მინისტრი, არამედ ის იყო ყოველთვის იქ, სადაც ჩვენს ქვეყანას ყველაზე ძალიან სჭირდებოდა.
და ყველაზე მთავარი, კახის ყველაზე კარგად ესმის რთულად, შრომით მოპოვებული გამარჯვების ფასი.
მაგრამ მე იმაშიც ვარ დარწმუნებული, რომ ამჯერად, მეგობრებო, ეს არ იქნება რთული გამარჯვება, ეს იქნება პატიოსან, სამართლიან ბრძოლაში ნამდვილი, ჭეშმარიტი გამარჯვება იმიტომ, რომ კახი ნამდვილად იმსახურებს ამ გამარჯვებას.
თბილისის მერობა არის ნამდვილად ძალიან მნიშვნელოვანი და ძალიან საინტერესო გამოწვევა და მე დარწმუნებული ვარ, რომ თავისი თანამედროვე, საინტერესო მიდგომებით, კახი კალაძე აუცილებლად, ძალიან მნიშვნელოვნად დაატყობს ხელს თითოეული თბილისელის ცხოვრებას.
მინდა წარმატება ვუსურვო კახის და დარწმუნებული ვარ, რომ ამ არჩევნებში სადაც ჩვენს პარტიას, „ქართულ ოცნებას“ აქვს ნამდვილად საფუძვლიანი იმედი ძალიან მყარი გამარჯვების, ეს არჩევნები იქნება აუცილებლად ჩვენი ქალაქისთვის, ჩვენი ულამაზესი თბილისისთვის და თითოეული თბილისელისთვის მომტანი კიდევ უფრო უკეთესი ხვალინდელი დღის.
დარწმუნებული ვარ კახი ძალიან წარმატებით გაართმევს თავს ამ ძალიან მნიშვნელოვან გამოწვევას.
კახი იქნება ჩვენი დედაქალაქის გამორჩეული და ყველაზე წარმატებული მერი“,– განაცხადა გიორგი კვირიკაშვილმა.