ემანუელ მაკრონს ირანის წინააღმდეგ წარმოებული ომის შესახებ ერთი დაგმობის სიტყვაც არ წარმოუთქვამს, – ამის შესახებ ირანის საგარეო საქმეთა მინისტრმა, აბას არაღჩიმ განაცხადა.
მისი თქმით, საფრანგეთის პრეზიდენტს ისრაელის ქმედება მაშინაც არ დაუგმია, როდესაც თეირანში საწვავის საცავი ააფეთქა.
„მან არ დაგმო ისრაელი, როდესაც თეირანში საწვავის საწყობი ააფეთქა, რამაც მილიონობით ადამიანი ტოქსინების ზემოქმედების ქვეშ მოაქცია. მისი ამჟამინდელი „შეშფოთება“ისრაელის მიერ ჩვენს გაზის ობიექტებზე თავდასხმას არ მოჰყოლია, ეს ჩვენს საპასუხო ქმედებას მოჰყვა. სამწუხაროა“, – წერს აბას არაღჩი სოციალურ ქსელ „იქსზე“.
ცნობისთვის, მანამდე საფრანგეთის პრეზიდენტმა, ემანუელ მაკრონმა განაცხადა, რომ სამოქალაქო ინფრასტრუქტურაზე, განსაკუთრებით ენერგეტიკულ და წყალმომარაგების ობიექტებზე, დარტყმებზე მორატორიუმი უნდა დაწესდეს.
ემანუელ მაკრონის თქმით, ის დონალდ ტრამპსა და კატარის ამირს დაუკავშირდა და აღნიშნა, რომ, „საერთო ინტერესებიდან“ გამომდინარე, დარტყმები დაუყოვნებლივ უნდა შეჩერდეს.
„სამოქალაქო მოსახლეობა, მათი ძირითადი საჭიროებები და ენერგომომარაგების უსაფრთხოება სამხედრო ესკალაციისგან დაცული უნდა იყოს“, – განაცხადა ემანუელ მაკრონმა.