რა ცვლილებებს გეგმავს კახა კალაძე თუ მას თბილისის მერად აირჩევენ? – ამის შესახებ ვიცე-პრემიერმა გადაცემა “იმედის კვირა”-ში სტუმრობისას ისაუბრა და განაცხადა, რომ პირველი, რაც მისი მერობის შემთხვევაში შეიცვლება ეს იქნება სტრუქტურული გადახალისება, რაც გულისხმობს მერიის მოქნილობის გაუმჯობესებას.
“ვისაუბროთ პრობლემებზე, დავიწყოთ ეკოლოგიის თვალსაზრისით, კვლევებიც ამაზე მეტყველებს, რომ ჰაერის დაბინძურების მხრივ ძალიან მძიმე მდგომარეობაა, ჯანსაღი ცხოვრება, ეს არის ძალიან მნიშვნელოვანი, ასევე არის პრობლემები ტრანსპორტის მიმართულებით,რაც ეკოლოგიას უქმნის საფრთხეს, ასევე პარკები და სკვერები, რომელიც კომპლექსურად უნდა მოგვარდეს, რადგან ეს პირდაპირ არის დაკავშირებული ჩვენი და ჩვენი შვილების ჯანმრთელობასთან.
ასევე საზოგადოებრივი ტრანსპორტის თვალსაზრისით არსებობს პრობლემები, იმის მიუხედავად, რომ მერიამ ახალი ავტობუსები შემოიყვანა და ამისთვის ძალიან დიდი მადლობა, მნიშვნელოვანია, თუმცა ეს არ არის საკმარისი.
ვფიქრობ მნიშვნელოვანი იქნება ყვითელი ავტობუსების პარკის სრულიად განახლება და თანამედროვე ავტობუსების შემოყვანა, რაც კიდევ უფრო მეტ კომფორტს შეუქმნის დედაქალაქის მოსახლეობას.
ძალიან მნიშვნელოვანია მეტროს მოდერნიზაცია და ძველი ვაგონების ჩანაცვლება ახალი, თანამედროვე მეტროს ვაგონებით, ასევე ძალიან მნიშვნელოვანია ქაოტური მშენებლობების შეჩერება, ძველი თბილისის რეაბილიტაცია-კონსერვაცია, ვფიქრობ არის ერთ-ერთი უმნიშვნელოვანესი მიმართულება “- განაცხადა კახა კალაძემ.