დონალდ ტრამპმა განაცხადა, რომ BBC-სთვის „გაკვეთილის სწავლება იყო საჭირო“ – აშშ-ის პრეზიდენტმა ეს განცხადება მაუწყებლის ახალი გენერალური დირექტორის გამოცხადებიდან სულ რამდენიმე საათში გააკეთა.
ოთხშაბათს, რესპუბლიკური პარტიის საქველმოქმედო ვახშამზე სიტყვით გამოსვლისას, ტრამპმა მაუწყებელი დაადანაშაულა “კორუფციაში” და თქვა, რომ მას “საშინელ სიტყვებს” აბრალებენ.
ტრამპმა “არაკეთილსინდისიერი” BBC-ის წინააღმდეგ ახალი თავდასხმა იმავე დღეს დაიწყო, როდესაც Google-ის ყოფილი აღმასრულებელი დირექტორი მეტ ბრიტინი BBC-ის ახალ ხელმძღვანელად წარადგინეს.
ბრიტინს მოუწევს გაუმკლავდეს პრეზიდენტის მიერ BBC-ის წინააღმდეგ 2024 წელს Panorama-ს ეპიზოდის ეთერში გაშვების გამო შეტანილ 7.5 მილიარდი ფუნტის ოდენობის მიმდინარე სარჩელის შედეგებს.
ბრალდებების შედეგად, BBC-ის მაშინდელი გენერალური დირექტორი, ტიმ დეივი, გადადგა.
ტრამპმა განაცხადა, რომ კორპორაციამ “აღიარა საკუთარი დანაშაული” და ახლა მხოლოდ ის დარჩა გადასაწყვეტი, რა ოდენობის კომპენსაციას მიიღებდა იგი.
სხვა მსხვილი მედიასაშუალებებისგან ადრე მიღებულ კომპენსაციებზე ხაზგასმით, ტრამპმა რესპუბლიკელ მხარდამჭერებს უთხრა: “სინამდვილეში, ეს საკმაოდ კარგია. იცით, თუ ასეთი ხალხის წინააღმდეგ სარჩელს შეიტანთ, ისინი იმდენად კორუმპირებულები არიან, რომ იხდიან მას. ეს საქმე ჯერ არ არის გადაწყვეტილი. რას იტყვით BBC-ზე? როცა მათ გამაშუქეს და მაჩვენეს, თითქოს მე ვამბობდი… ისეთ რაღაცებს, რაც არასოდეს მითქვამს და რაც საშინელი იყო. ჩვენ გადავამოწმეთ ეს და აღმოჩნდა, რომ ყალბი ამბავი იყო. მათ მომაწერეს სიტყვები – მთელი წინადადებები და აბზაცები, რომლებიც უკიდურესად საშინელი იყო. ამიტომაც შევიტანეთ სარჩელი მათ წინააღმდეგ, და მათ აღიარეს, რომ დამნაშავეები იყვნენ. წარმოგიდგენიათ, რამდენად არაკეთილსინდისიერები არიან? ახლა მხოლოდ ის საკითხია გასარკვევი, რამდენს მივიღებ”, – ციტირებს ტრამპის სიტყვებს The Telegraph.