გიორგი კვირიკაშვილი: ივნისში საქართველოს 330 000-მდე ტურისტი ეწვია

საქართველოს პრემიერ-მინისტრი გიორგი კვირიკაშვილი საქართველოში ტურისტების რაოდენობის ზრდის საკითხს გამოეხმაურა.
როგორც მან აღნიშნა, ივნისის თვეში უპრეცედენტო მაჩვენებელი – 43%-იანი ზრდა დაფიქსირდა. პრემიერის განმარტებით, ეს არის იმ ტურისტების რიცხვი, რომლებმაც 24 საათი და მეტი დაჰყვეს საქართველოში. მისივე თქმით, მნიშვნელოვანია ტურიზმის მიმართულებით გაძლიერდეს ინვესტიციები და ძალისხმევა, რათა საქართველომ ეს პოტენციალი მაქსიმალურად გამოიყენოს. „ეს არის იმ ტურისტების რიცხვი, რომლებმაც 24 საათი და მეტი დაჰყვეს საქართველოში და მათი რაოდენობა თითქმის 99 000-ით მეტია 2016 წლის ივნისის მაჩვენებელზე. ბოლო 6 თვის მონაცემებით, ტურისტთა რაოდენობა არის 29%–ით გაზრდილი, რაც კარგი მაჩვენებელია. ასევე მნიშვნელოვანია, რომ ტურისტების შემოსვლა ჩვენს ქვეყანაში იზრდება როგორც რეგიონის, ასევე ევროკავშირის ქვეყნებიდან – ავსტრია +54%, ნიდერლანდები +36%, გერმანია +32%, გაერთიანებული სამეფო +28% და მე დიდი იმედი მაქვს, რომ მას შემდეგ რაც ჩვენ გვაქვს პირდაპირი ფრენები ლონდონის მიმართულებით, როგორც ქუთაისიდან, ასევე თბილისიდან, კიდევ უფრო მეტი ტურისტი შემოვა გაერთიანებული სამეფოდან. საფრანგეთიდან გვაქვს 23%–იანი ზრდა და ლიტვა 17%. ამასთან, მნიშვნელოვნად არის გაზრდილი ტურისტების რიცხვი აზიის ქვეყნებიდანაც. თითოეული დამატებით შემოსული ტურისტი ნიშნავს დამატებით შემოსავალს ჩვენი მოსახლეობის პირად ბიუჯეტში და იმ ადამიანების ბიუჯეტში, რომლებიც სხვადასხვა ფორმით იღებენ სარგებელს ტურიზმიდან–ვაჭრობა, მცირე სასტუმროები, ტრანსპორტი, სოფლის მეურნეობა, სხვადასხვა ტიპის მომსახურება”, – განაცხადა პრემიერ-მინისტრმა.