“ის რაც ჩვენ გავაკეთეთ ენერგეტიკის დარგში ეს არის დაუღალავი შრომის და ერთობის შედეგი”, – ამის შესახებ ენერგეტიკის მინისტრმა, “ქართული ოცნების” თბილისის მერობის კანდიდატმა კახა კალაძემ 5 წლიანი მოღვაწეობის ანგარიშის წარდგენისას განაცხადა. მისი თქმით, ყველაფერი მიღწევადია, როდესაც გჯერა და შრომა არ გეზარება.
“მინდა გავიხსენო ჩემთვის სენსიტიური მომენტი, როდესაც პატარა ბიჭი ვიყავი, მინდოდა გამოვსულიყავი ფეხბურთელი და მეთამაშა მაგარ გუნდში და ერთ დღეს მითხრეს, რომ ჩემგან არაფერი გამოვიდოდა და მითხრეს, რომ წავსულიყავი სახლში. ეს სიტყვები მაშინ ძალიან მძიმე იყო ჩემთვის, ძალიან რთული იყო. ატირებული, ცრემლიანი დავბრუნდი სახლში, თუმცა, თავი არ დამიხრია.
მინდა გითხრათ, რომ როდესაც, რაღაცის გულით გჯერა და შრომა არ გეზარება, ყველაფერი არის შესაძლებელი და ის, რაც ჩვენ გავაკეთეთ ენერგეტიკის დარგში, ეს არის იმ დაუღალავი შრომის, იმ ერთობის შედეგი, რაც ამ წლების განმავლობაში იყო ენერგეტიკის დარგში.
მე დღეს ვტოვებ თანამდებობას. ჩემთვის იწყება ძალიან მნიშვნელოვანი ეტაპი ცხოვრებაში. მე, გუნდის ლიდერმა, ბატონმა გიორგი კვირიკაშვილმა წარმადგინა მერობის კანდიდატად და მინდა გითხრათ, რომ რა თქმა უნდა, არჩევის შემთხვევაში, ყველაფერს გავაკეთებ იმისათვის, რომ ჩვენი დედაქალაქი, ჩვენი თბილისი იყოს წარმატებული. მე მჯერა გუნდის თანადგომის, მე მჯერა თბილისელების თანადგომის რადგან, ნათქვამია, მარტო კაცი ჭამაში არ ვარგაო და ამ ერთობით ჩვენ შევძლებთ ყველა იმ პრობლემების მოგვარებას, რომელიც აწუხებს დღეს თბილისს და თბილისში მცხოვრებ ადამიანებს. კიდევ ერთხელ, ძალიან დიდი მადლობა თითოეულ თქვენთაგანს, მადლობა გუნდს, მადლობა ჩემს თანამშრომლებს“, – განაცხადა კალაძემ.