„რა ხდება? ხდება ის, რომ საქართველოსა და სამხრეთ ოსეთს შორის უნდა იყოს საზღვარი და ამას აკეთებენ სამხრეთ ოსეთის წარმომადგენლები. მათ არაერთხელ მოითხოვეს საზღვრის დემარკაციის საკითხზე მსჯელობა, მაგრამ ქართულ მხარეს ეს არ სურს“,– ამის შესახებ, დღეს რუსეთის საგარეო საქმეთა მინისტრის მოადგილემ გრიგორი კარასინმა პრაღაში ზურაბ აბაშიძესთან შეხვედრის შემდეგ განაცხადა. ინფორმაციას 1tv.ge ავრცელებს.
მისი თქმით, აბაშიძე-კარასინის შეხვედრამდე გარკვეული ძალები სიტუაციის დაძაბვას ცდილობენ, რათა რუსეთ-საქართველოს შორის ურთიერთობების ნორმალიზებას ხელი შეუშალონ.
“უნდა აღინიშნოს, რომ ჩვენ შეხვედრამდე, სიტუაციის დაძაბვა ხდება. საქართველოში გარკვეულ ძალებს ეს სჭირდებათ, ვინც ჩვენს ქვეყნებს შორის ურთიერთობების ნორმალიზების წინააღმდეგნი არიან. გვარებსა და სახელებს არ დავასახელებ. თქვენ იცით მათ შესახებ. ან სკანდალს აწყობენ, ან ვიღაც მიჰყავთ საზღვარზე და აკეთებენ განცხადებებს. ეს აჩვენებს, რომ ყველას ინტერესში არ შედის, რომ ურთიერთობები განვითარდეს“, – განაცხადა კარასინმა.
მისივე განმარტებით, რუსეთ-საქართველოს ურთიერთობაში პოზიტიური ახალი ამბებიც არის.
„გვაქვს პოზიტიური ახალი ამბები, ეს ეხება, მაგალითად, არქივებს, დაინტერესებულები არიან, რომ ურთიერთობები ჰქონდეთ. მე ვფიქრობ, რომ წავედით წინ საბაჟო რეგულირების საკითხების მოგვარების კუთხით.
ძალიან დიდი ხანია, ამაზე ვმუშაობთ. მე მექმნება შთაბეჭდილება, რომ პრაქტიკული რეალიზაციის ეტაპზე ვართ. მოვილაპარაკეთ ექსპერტების დონეზე შეხვედრებზე, თუ როგორ მოვახდენთ ყაზბეგი-ლარსის გზის მოდერნიზებას. ამის შესახებ ექსპერტებმა უნდა იმსჯელონ.
აღვნიშნეთ, რომ ვაჭრობის მაჩვენებელი ქვეყნებს შორის გაიზარდა. წელს, პირველი 6 თვის მანძილზე, თითქმის 40 პროცენტით გაიზარდა სავაჭრო ბრუნვა. ტურიზმიც პერსპექტიული მიმართულებაა“, – განაცხადა კარასინმა.
აბაშიძე-კარასინის ფორმატით, მორიგი შეხვედრა დღეს პრაღაში გაიმართა. 2011 წელს გაფორმებული საბაჟო მონიტორინგის შესახებ შეთანხმების იმპლემენტაციის საკითხის გარდა, შეხვედრაზე საქარველოს პრემიერის სპეციალურმა წარმომადგენელმა სოფელ ბერშუეთში საოკუპაციო ხაზის გადმოწევის საკითხიც დააყენა.