საგარეო საქმეთა მინისტრი მიხეილ ჯანელიძე საქართველოსა და იაპონიას შორის დიპლომატიური ურთიერთობების დამყარების 25 წლის იუბილისადმი მიძღვნილ მიღებას დაესწრო.
“საქართველოს და იაპონიას აერთიანებს ისეთი ფუნდამენტური ღირებულებები, როგორიცაა დემოკრატია, თავისუფლება, ადამიანის უფლებები, კანონის უზენაესობა და ლიბერალური ეკონომიკა”, – აღნიშნა მიხეილ ჯანელიძემ. მინისტრმა საინვესტიციო ხელშეკრულებაზე ოფიციალური მოლაპარაკებების დაწყების მნიშვნელობაზე და 5 ივნისს ძალაში შესულ გამარტივებულ სავიზო მოთხოვნებზე გაამახვილა ყურადღება.
იაპონიის ელჩის, ტოშიო კაიტანის საქართველოში დიპლომატიური საქმიანობა დასრულდა. მისი საქართველოში მოღვაწეობის პერიოდში, იაპონიის კანონმდებლობაში ცვლილება განხორციელდა – იაპონურ ენაში საქართველოს ოფიციალური დასახელება “გრუზია” “ჯორჯიათი” შეიცვალა. ტოშიო კაიტანი ქართული კულტურის და ენის დიდი თაყვანისმცემელია.
მიღებას საკანონმდებლო და აღმასრულებელი ხელისუფლების წარმომადგენლები, დიპკორპუსი და მოწვეული სტუმრები ესწრებოდნენ.