“ჩვენ აფხაზეთს და ”სამხრეთ ოსეთს” არ ვცნობთ არც დამოუკიდებელ სახელმწიფოებად და არც რესპუბლიკებად”

ნატო-ს გენერალურმა მდივანმა, იენს სტოლტენბერგმა, რუსეთის საოკუპაციო ხაზის 700 მეტრით გადმოწევასთან დაკავშირებით, პირველი კომენტარი გააკეთა.  
იენს სტოლტენბერგმა არსებული მდგომარეობა შეაფასა და საკუთარი აზრი დააფიქსირა. მან ასევე აღნიშნა, რომ შეხვედრაზე საქართველოს საკითხი არ განხილულა.

”ჩვენ არ განვიხილეთ ეს საკითხი, მაგრამ არა იმიტომ, რომ ნატო-ს არ აღელვებს საქართველოში არსებული ვითარება. ჩვენ ვისაუბრეთ უკრაინასა და ავღანეთზე და რისკის შემცირებაზე.
მაგრამ, როგორც ნატო-ს გენერალური მდივანი ვაცხადებ, რომ შეშფოთებული ვართ, რადგან ვხედავთ, რომ რამდენჯერმე გადმოსწიეს ე.წ. საზღვარი. ჩვენ აფხაზეთს და ”სამხრეთ ოსეთს” არ ვცნობთ არც დამოუკიდებელ სახელმწიფოებად და არც რესპუბლიკებად. ორივე საქართველოს ნაწილია და შედის მის საერთაშორისოდ აღიარებულ საზღვრებში. 
ჩვენ მხარს ვუჭერთ კონფლიქტის მშვიდობიანი გზით გადაჭრის ყველანაირ მცდელობას და განვაგრძობთ საქართველოს დახმარებას განახორციელოს მოდერნიზაცია, გააძლიეროს შესაძლებლობები საკუთარი თავის დასაცავად და ვითარების სტაბილიზაციაშიც, რადგან ქვეყანაში ვხედავთ უცხო ქვეყნის ჯარებს”,- განაცხადა იენს სტოლტენბერგმა.