საქართველოს საგარეო საქმეთა სამინისტროს განცხადებით, ბათუმში დღევანდელ კონფერენციაზე მინისტრ მიხეილ ჯანელიძის ციტატა მედიის მიერ არასწორად იყო მოყვანილი.
საქართველოს საგარეო საქმეთა სამინისტროს ცნობით, ვიცე-პრემიერმა, საგარეო საქმეთა მინისტრმა მიხეილ ჯანელიძემ კონფერენციაზე – „საქართველოს ევროპული გზა“ ერთ-ერთ პანელზე სიტყვით გამოსვლისას ოპოზიციის წარმომადგენლის შეკითხვას უპასუხა.
„სამწუხაროდ, საინფორმაციო სააგენტოების მხრიდან არასწორად იქნა მოყვანილი მინისტრის ციტატა“, – აცხადებენ სამინისტროში. სამინისტრო ინგლისურ ენაზე მიხეილ ჯანელიძის პასუხის ორიგინალ ვერსიას, აუდიო ჩანაწერს და მის ქართულენოვან თარგმანს ავრცელებს.
„რაც შეეხება რუსეთის პოლიტიკას რეგიონში, რუსეთმა მოახდინა ჩვენი ტერიტორიების ოკუპაცია 2008 წელს და, სამწუხაროდ, იმ მომენტში, საერთაშორისო საზოგადოებამ არ დაუწესა სანქციები რუსეთს ამ ქმედებისთვის და, სამწუხაროდ, ჩვენმა მთავრობამ იმ მომენტში ვერ შეძლო საერთაშორისო მხარდაჭერის მობილიზება იმისთვის, რომ მიეღო იმავე სტილის რეაგირება რუსეთის აგრესიაზე, აგრესიულ ქმედებებზე“, – განაცხადა ჯანელიძემ.