უკრაინის პრეზიდენტმა პეტრო პოროშენკომ საქართველოს პრეზიდენტის სასახლეში გამართული ერთობლივ პრესკონფერენციაზე საქართველოსა და უკრაინას შორის არსებულ გამოწვევებზეც ისაუბრა და აღნიშნა, რომ უკრაინელ ხალხს სჯერა ქართველი ხალხის გვერდში დგომის. უკრაინის პრეზიდენტმა ქართველ მეომრებს მადლობა გადაუხადა 2014 წელს უკრაინის ტერიტორიული მთლიანობის დასაცავად ბრძოლებში მონაწილეობისთვის.
„საქართველოს და უკრაინას ერთნაირი საფრთხეები ემუქრება და ჩვენ არავის მივცემთ საშუალებას გვიკარნახოს ჩვენი მომავალი. უკრაინელ ხალხს სირთულეების დროს იმედი აქვს ქართველი მოძმე ხალხის, ისევე როგორც ქართველ ხალხს შეუძლია ჰქონდეს უკრაინელი ხალხის იმედი. ასე იყო 2008 წელს, 2014 წელს და ახლაც ასეა. უკრაინელები თავს ხრიან ქართველი მოძმე ბიჭების პატივსაცემად, რომლებიც 2014 წელს ჩამოვიდნენ ჩვენს ქვეყანაში და იცავდნენ უკრაინის სუვერენიტეტს, ისინი დარწმუნებულნი იყვნენ, რომ ამით ასევე იცავდნენ საქართველოს. თითოეულ ჩვენგანს გვაქვს პერსონალური პასუხისმგებლობა, რომელიც მიზნად ისახავს უკრაინელი და ქართველი ხალხის მეგობრობას. ჩემი მეუღლის ბაბუა ჰოლოდომორის დროს თბილისში გაიქცა და შიმშილით სიკვდილს გადაურჩა. ჩემი მეუღლის ბებია კი სტალინგრადიდან თბილისში გადავიდა. ვაპირებ ვნახო ის ოჯახი თბილისში, ვინც ჩემი მეუღლის ბებია შეიფარა და გადაარჩინა. ასეთი მაგალითები გვაძლევს სტიმულს და რჩება თაობებში, აყალიბებს მტკიცე საფუძველს ჩვენი ნდობის და ჩვენი მეგობრობის. სწორედ ეს მაგალითები აყალიბებს ჩვენს ურთიერთობებს და ქმნის ისტორიას“, – განაცხადა პოროშენკომ.