რეგიონები არის ხერხემალი ჩვენი სახელმწიფოსი და რა თქმა უნდა, ეს არის მთავარი პრიორიტეტი ჩვენი ხელისუფლებისაც, – განუცხადა ჟურნალისტებს ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილმა.
მახაშვილის თქმით, ბევრი რამ კეთდება ცალკეული მიმართულებებით, მაგრამ ამავე დროს მნიშვნელოვანია მოხდეს ამ ყველაფრის კოორდინაცია.
„რეგიონები არის ხერხემალი ჩვენი სახელმწიფოსი და რა თქმა უნდა, ეს არის მთავარი პრიორიტეტი ჩვენი ხელისუფლებისაც. ბევრი რამ კეთდება ცალკეული მიმართულებებით, იქნება ეს სოფლის მეურნეობა, ჯანდაცვა, ინფრასტრუქტურა, განათლება და ა.შ. მაგრამ ამავე დროს მნიშვნელოვანია მოხდეს ამ ყველაფრის კოორდინაცია.
მოსახლეობასთან შეხვედრებზეც არაერთხელ გამოიკვეთა, რომ ბევრი რაღაც ცალ-ცალკე შესაძლოა კეთდება, მაგრამ აკლია ამას კოორდინაცია, ერთიანობაში მოქცევა, რათა ეს არ იყოს რაღაც ავტონომიური, ქაოსური ცალ-ცალკე პროცესები. არამედ, ერთიანობაში გაკეთებული პროცესი, რომ მაქსიმალურად ხარჯეფექტიანად მოხდეს ბიუჯეტის თანხების ინვესტიცია მოსახლეობის პრობლემების მოგვარებაში. ამ მხრივაც, ეს ახალი პოზიცია, მითუმეტეს მამუკა მდინარაძის ხელმძღვანელობით, იქნება სწორი. მთავარი მიზანი სწორედ ეს არის, რომ სახელმწიფო მმართველობა იყოს მაქსიმალურად ეფექტიანი“, – აღნიშნა ლევან მახაშვილმა.
რეგიონული პოლიტიკის საკითხებში სახელმწიფო მინისტრის თანამდებობას ვიცე-პრემიერი მამუკა მდინარაძე დაიკავებს. საკანონმდებლო ცვლილებებამდე ის რეგიონული განვითარების მინისტრის თანამდებობას იკავებს. სექტემბრის პირველ კვირაში გაუქმდება სამართალდამცავი ორგანოების საკითხებში სახელმწიფო მინისტრის თანამდებობა.