საგარეო საქმეთა მინისტრმა მიხეილ ჯანელიძემ განაცხადა, რომ პრეზიდენტის ადმინისტრაციას საქართველოს მთავრობასთან საკითხი, რომელიც საქართველოს საკითხებში აშშ-ს სპეციალური წარმომადგენლის დანიშვნას ითვალისწინებს, არ განუხილავს.
„ეს არის მისი ინიციატივა. მე ამ საკითხის ზედმეტი პოლიტიზებისგან ან თუნდაც დაპირისპირების ფორმატში მისი გადატანისგან თავს შევიკავებდი, რადგანაც პრეზიდენტის ადმინისტრაციაც, პრეზიდენტიც ინფორმირებულია ყველა იმ ურთიერთობის შესახებ, რომელიც საქართველოს გააჩნია აშშ-სთან, ახალ ადმინისტრაციასთან. ჩვენ ნამდვილად გვაქვს ძალიან მჭიდრო თანამშრომლობა აბსოლუტურად ყველა გადაწყვეტილების მიმღებ პირთან და შეგვიძლია ნებისმიერ საკითხზე მსჯელობა.
ჩვენ მასთან ორი დღის განმავლობაში გვქონდა შესაძლებლობა გვესაუბრა ყველა საკითხზე და ასევე გავაგრძელებთ მჭიდრო თანამშრომლობას ჩვენს პარტნიორებთან, რომ ნებისმიერი ნაბიჯი, რომელიც გადაიდგმება, იყოს იმ საჭიროებიდან გამომდინარე, რომელიც ჩვენს სტრატეგიულ პარტნიორობას აქვს”, – ამის შესახებ, ვიცე პრემიერმა საგარეო საქმეთა მინისტრმა მიხეილ ჯანელიძემ ტელეკომპანია „პალიტრანიუსის“ გადაცემა „360 გრადუსში“ სტუმრობისას განაცხადა.