გალში მცხოვრები ეთნიკურად ქართველები ამბობენ, რომ მათი მომავალი ამ პირობებში არის გაურკვეველი, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ჟურნალისტებს გალში, ე.წ. ახალი პასპორტიზაციის შესახებ ინფორმაციის კომენტირებისას განუცხადა.
მისივე განცხადებით, უნდა შეკავდეს ზეწოლა, რომ გალში მცხოვრები ადამიანები იძულებულები არ გახდნენ, დატოვონ საკუთარი სახლ-კარი.
“ჩვენი ამოცანაა, პირველ რიგში, მაქსიმალური გავაკეთოთ იმისთვის, რომ ეს საკითხი კიდევ უფრო გააქტიურდეს საერთაშორისო დღის წესრიგში. ვგულისხმობ გალის მოსახლეობის უფლებრივ მდგომარეობასა და უსაფრთხოებას. ყველა მექანიზმი უნდა ამოქმედდეს იმისთვის, რომ გაუმჯობესდეს მათი მდგომარეობა. საუბარია, როგორც მშობლიურ ენაზე განათლების მიღებაზე, ასევე გადაადგილების თავისუფლებაზე. ასევე უნდა შეკავდეს ზეწოლა, რომ ეს ადამიანები იძულებულები არ გახდნენ, დატოვონ საკუთარი სახლ-კარი, რაც არაფრის დიდებით არ მოხდება. ჩვენ ორმაგ ძალისხმევას მივმართავთ ადამიანების უფლებების დასაცად”,- აღნიშნა მინისტრმა.
მისივე განმარტებით, ბოლო წლების განმავლობაში კონტაქტები ძალიან სწრაფად იზრდება, თუმცა, ამის პარალელურ რეჟიმში, მუდმივად ხდება ბარიკადებისა და ხელოვნური ბარიერების აღმართვა.
“ეს ეხება მავთულხლართებს, გადასასვლელების ჩაკეტვას, დამატებით ზეწოლას ადამიანებზე, განსაკუთრებით გალის რაიონში, სადაც ცხოვრობენ ეთნიკურად ქართველები. საუბედუროდ, ამ 25 წლის განმავლობაში მათ მიმართ მკვეთრად დისკრიმინაციული რეჟიმი ჩამოყალიბდა ეთნიკური ნიშნით. ამ ადამიანებს ერთმევათ მშობლიურ ენაზე განათლების მიღების შესაძლებლობა. ასევე საუბარია გადასასვლელების ჩაკეტვაზე. ექვსიდან 4 ე.წ. გადასასვლელი დაიხურა აფხაზეთის ადმინისტრაციული გამყოფი ხაზის პერიმეტრზე. ასევე ეს ეხება დოკუმენტებთან წვდომის საკითხს. ჩვენთვის, რა თქმა უნდა, ლეგიტიმური ვერ იქნება ვერცერთი დოკუმენტი, რომელიც გაიცემა. ერთადერთი საშუალება, რომელიც დღეს გალის ქართველ მოსახლეობას აქვს (ე.წ. დროებითი ბინადრობის მოწმობა), ამ დოკუმენტის აღებაც გარკვეულ სირთულეებთან არის დაკავშირებული. გალში მცხოვრები ეთნიკურად ქართველები ამბობენ, რომ მათი მომავალი ამ პირობებში არის გაურკვეველი”,- ამბობს ციხელაშვილი.
შეგახსენებთ, რომ გალის დე ფაქტო ადმინისტრაციამ ოკუპირებულ აფხაზეთში მცხოვრები მოსახლეობა ე.წ. პასპორტიზაციის ახალი ეტაპის დაწყების შესახებ გააფრთხილა. დე ფაქტო რეჟიმი აპირებს, 2018 წლიდან დღემდე არსებული ყველა ე.წ. დოკუმენტი გააუქმოს. შედეგად, გალში მცხოვრებ ეთნიკურ ქართველებს მოუწევთ, უარი თქვან საქართველოს მოქალაქეობაზე, აიღონ ე.წ. აფხაზეთის მოქალაქის ახალი პასპორტი, ან დათანხმდნენ ე.წ. ბინადრობის მოწმობას, რომელიც მათ უფლებებს შეზღუდავს.
“გალში მცხოვრები ეთნიკურად ქართველები ამბობენ, რომ მათი მომავალი ამ პირობებში არის გაურკვეველი”
2017/08/14 13:35:18
კომენტარები
ნანახია: 1416 ჯერ