ბორჯომის ხეობაში არსებული ვითარების შეჯამებისას პრემიერ–მინისტრმა გიორგი კვირიკაშვილმა განაცხადა, რომ „შეიძლება ითქვას, ხანძარი ლიკვიდირებულია“.
„საღამოს პირადად შემოვიარე მინისტრებთან ერთად ყველა კრიტიკული ლოკაცია, შეიძლება ითქვას, რომ ხანძარი არის ლიკვიდირებული, შესაძლოა მომდევნო დღეების განმავლობაში იყოს ცალკეული სახანძრო წერტილოვანი კერები, რასაც შესაბამისად მივხედავთ, სწორედ ამიტომ შტაბი გააგრძელებს მომდევნო დღეების განმავლობაში მუშოაბას, ტექნიკა იქნება მობილიზებული, რათა ასეთი წერტილოვანი კერები იქნეს ჩამქრალი“, – განაცხადა გიორგი კვირიკაშვილმა.
ბორჯომის ხეობაში ხანძარი 20 აგვისტოს გაჩნდა. შედეგად დამწვარია დაახლოებით 100 ჰექტარი ფართობი. სამაშველო ღონისძიებებში 1500–მდე მეხანძრე იყო ჩართული. მუშაობდა სპეცტექნიკა და სახანძრო ავიაცია. დღეიდან ხანძრის კერების სალიკვიდაციო სამუშაოებში საქართველოს შეიარაღებული ძალების წარმომადგენლები ჩაერთვნენ.