კულტურისა და ძეგლთა დაცვის მინისტრის განცხადებით, ქეთი დოლიძე თანამდებობიდან არც გათავისულებული და არც მოხსნილი არ არის. როგორც მიხეილ გიორგაძე ამბობს, დოლიძემ ბოლომდე მიიყვანა ის ვადა, რომელიც მისი თანამდებობისთვის იყო განსაზღვრული. მიხეილ გიორგაძემ გადაცემაში „დღის ამბები“ განმარტა, რომ კულტურის სამინისტროში გადაწყვეტილებები პირად დამოკიდებულებასა და წყენაზე დაფუძნებით არ მიიღება.
„მე არასდროს პირადი დამოკიდებულება არ დამიყენებია, რაღაც ობიექტური რეალობის წინ, როდესაც რაღაც გადაწყვეტილებებზე ვსაუბრობთ. თუ თქვენ გადაავლებთ თვალს, თუნდაც სოციალურ ქსელში, ან იგივე სატელევიზიო ეთერებში კინომსახიობთა თეატრისა და კულტურის სამინისტროს რაღაც ისტორიას ურთიერთობისას, თქვენ დაინახავთ, რომ იქ მხოლოდ ერთი მხარე ფიგურირებს, რომელიც მუდმივად დაუსაბუთებელ ბრალდებებს უყენებს კულტურის სამინისტროს, ხშირ შემთხვევაში ეს უბრალოდ შეურაცხყოფაშიც გადადიოდა. მინისტრი მუდმივად აღმოჩნდება ხოლმე მომპასუხის როლში და თავდაცვის რეჟიმში, რაც მგონია, რომ არანორმალური მდგომარეობაა. უბრალოდ ამას ვამბობ იმისთვის, რომ დაგანახოთ, რომ ჩემი მხრიდან დაპირისპირება, საჯარო განცხადებები და ა.შ. არასდროს არ ყოფილა.
ჩემთვის სრულიად მიუღებელია, ძალიან პროფესიული, ძალიან ობიექტური პროცესის პოლიტიზირებისა და აბსოლუტურად არაჯანსაღი აჟიოტაჟის გაღვივების მცდელობა.
ქალაბატონი ქეთევანი არ არის არც მოხსნილი და არც გათავისუფლებული. მან ჩაამთავრა ის ვადა, რომელიც კანონის მიხედვით, მას როგორც ხელმძღვანელს თავის დროზე ჰქონდა მიცემული და ამ ვადის გასვლის შემდეგ, შეირჩა ახალი ხელმძღვანელი. მე ძალიან ვწუხვარ, რომ თანამდებობის შენარჩუნების წყურვილი ადამიანებს აკარგვინებს სახეს“, – განაცხადა მიხეილ გიორგაძემ.