დარწმუნებული ვარ, ძალიან ბევრი ახალგაზრდა მოინდომებს, დაბრუნდეს და ფეხი მოიკიდოს იქ, სადაც მათი ფესვებია, – ამის შესახებ საქართველოს პრემიერ-მინისტრმა გიორგი კვირიკაშვილმა ამბროლაურში განაცხადა, სადაც რაჭა-ლეჩხუმისა და ქვემო სვანეთის რეგიონის მერობის „ქართული ოცნების“ კანდიდატები წარადგინა.
„ჩვენ ერთად გავიარეთ ხუთი ძალიან მნიშვნელოვანი წელი ჩვენი ქვეყნის ცხოვრებაში. მეხუთე არჩევნებს ვუახლოვდებით და ძალიან მნიშვნელოვანია, ერთად დავდგეთ იმისთვის, რომ ჩვენი დაწყებული ყველა კარგი საქმე ბოლომდე მივიყვანოთ. დღევანდელი არჩევანი განაპირობებს რაჭა-ლეჩხუმის და ქვემო სვანეთის, ყოველი ქალაქის და ყოველი სოფლის განვითარებას, თქვენი ოჯახების მომავალს. ამიტომ, დარწმუნებული ვართ, რომ ჩვენ კიდევ ერთხელ სწორ არჩევანს გავაკეთებთ და ხმას მივცემთ ჩვენი ქვეყნის, ჩვენი კუთხის უკეთეს მომავალს. „ქართულმა ოცნებამ“ ამ წლების განმავლობაში ძალიან ბევრი ნაბიჯი გადადგა იმისათვის, რომ ჩვენს ხალხს ეგრძნო შვება და თითოეული ჩვენგანის ოჯახის მდგომარეობა გაუმჯობესებულიყო“, – განაცხადა პრემიერმა.
ამ კონტექსში გიორგი კვირიკაშილმა ხაზი გაუსვა ჯანდაცვის და სოციალურ პროგრამებს, სოფლის მეურნეობის წარმოების ხელშეწყობას.
„ამაზე მეტყველებს ჯერ არნახული პროექტები, რომლებიც ხორციელდება საქართველოს ყველა კუთხეში. ეს პროექტები არის უპრეცედენტო დამოუკიდებელი საქართველოს ისტორიაში, მაგრამ ჩვენ ვიცით, რომ ეს არ არის საკმარისი და საჭიროა უფრო მეტი მასშტაბი“, – დასძინა პრემიერმა.