თბილისის მერობის კანდიდატმა კახა კალაძემ, მთაწმინდაზე “ქართული ოცნების” მაჟორიტარობის კანდიდატი საკლრებულოში – ჯაბა ჯიშკარიანი წარადგინა.
კალაძემ განაცხადა, რომ მთაწმინდის მოსახლეობას ყველა ის პრობლემა მოუგვარდება, რომელიც ამ რაიონს აწუხებს.
“რა თქმა უნდა, ამას სჭირდება სახელისუფლო მხარდაჭერა, რომელიც ჩვენ დღეს გვაქვს. ჩვენს გუნდთან ერთად, თქვენს მაჟორიტართან ერთად, პირველივე დღიდან ძირეულად დავიწყებთ იმ პრობლემების მოგვარებას, რომელიც ამ რაიონს აქვს. ჩვენ ძველი თბილისის განვითარების საკმაოდ ამბიციური გეგმა გვაქვს. ეს იქნება დამატებითი სტიმული – ახალი სიცოცხლე ძველი თბილისისთვის. კარგად ვიცი ავარიული სახლების პრობლემა, რომელიც თქვენს რაიონშია, კარგად ვიცი ის პრობლემები, რომელიც კომუნიკაციების მიმართულებით გაქვთ. ეს ყველაფერი გაკეთდება და ჩვენ ამას ერთობლივად აუცილებლად შევძლებთ. რაც მთავარია, ჩვენ მოვახერხებთ იმას, რომ თბილისი ძალიან მალე, ძალიან სწრაფად იყოს სიცოცხლით სავსე ქალაქი. ჩვენ მივალთ ყველა რაიონში, ყველა უბანში, მაქსიმალურად შევეცდებით, რომ გავესაუბროთ თითოეულ თბილისელს, რათა ერთად გავიაზროთ თუ რა უნდა გაკეთდეს სამომავლოდ. ამიტომ, ჩვენ გვექნება ძალიან ბევრი შეხვედრები როგორც მთაწმინდის, ისე თბილისის სხვა რაიონებში“ – განაცხადა კალაძემ.