ეკა მიშველაძე – “ნაციონალური მოძრაობა“ ცილს სწამებს ადამიანებს

პრეზიდენტის პრესსპიკერი მოსამართლეობის კანდიდატებთან დაკავშირებით „ნაციონალური მოძრაობის“განცხადებას ეხმაურება. როგორც ეკა მიშველაძემ ბრიფინგზე განაცხადა, „ნაციონალური მოძრაობა“ ცილს სწამებს ადამიანებს, რომელთა ბიოგრაფიაში არანაირი პარტიული კუთვნილება არ იკვეთება.
„საქართველოს პრეზიდენტი იმედოვნებს, რომ პარლამენტი ამჯერად მაინც მოეკიდება მეტი პასუხისმგებლობით უზენაესი სასამართლოს მოსამართლეების დანიშვნის საკითხს. ჯერ ადრეა ამაზე საუბარი და იმის დაშვება, დაუჭერს თუ არა პარლამენტი ამ კანდიდატურებს მხარს. იმედი გვაქვს, საქართველოს პარლამენტი მეტი პასუხისმგებლობით მოეკიდება ამ საკითხს. პრეზიდენტმა არაერთხელ აღნიშნა, რომ, სამწუხაროდ, მას პარლამენტში არ ჰყავს მოკავშირეები სასამართლო სისტემის განახლების და გაჯანსაღების პროცესთან დაკავშირებით.
„ნაციონალური მოძრაობა“, რომელმაც თავის დროზე ხელისუფლებაში ყოფნისას პოლიტიკურ დიქტატს დაუქვემდებარა ხელისუფლების უმნიშვნელოვანესი შტო, ცილს სწამებს ადამიანებს, რომელთა ბიოგრაფიაში არანაირი პარტიული კუთვნილება არ იკვეთება და შესაძლოა, სწორედ ამიტომაც არც „ნაციონალური მოძრაობა“ და არც „ქართული ოცნება“ ყოველგვარი არგუმენტაციის გარეშე არ უჭერს მხარს პრეზიდენტის მიერ წარდგენილ მაღალი პროფესიული ხარისხის კანდიდატებს“, – განაცხადა ეკა მიშველაძემ.
პრეზიდენტის პრესსპიკერის თქმით, გიორგი მარგველაშვილი იმედს გამოთქვამს, რომ ამჯერად მაინც პარლამენტის წევრები კვალიფიციურად მიუდგებიან საკითხს, გაიზიარებენ მიუკერძოებელი სასამართლოს საჭიროებას და მხარს დაუჭერენ წარდგენილ კანდიდატებს.