დღეს, ტყიბულის მინდელის სახელობის შახტაში, დაახლოებით 03:45 საათზე, დასავლეთის მე-10 ველში, პირველ ნახშირმომპოვებელ უბანში, სავარაუდოდ, მოხდა ე.წ. „სამთო დარტყმა“ (გვირაბის გვერდითი ქანების ჩამოშლა, რომელსაც ახლავს ჰაერის დარტყმითი ტალღის გავრცელება), რის შედეგად6 ადამიანი გარდაიცვალა და 3 დაშავდა.
კომპანია “საქნახშირის” ტექნიკური უსაფრთხოების დირექტორის ინფორმაციით, შემთხვევის ადგილზე უსაფრთხოების ნორმები დაცული იყო.
ამ დროისთვის მინდელის სახელობის შახტაში ნახშირის მოპოვების სამუშაოები შეჩერებულია.
შინაგან საქმეთა სამინისტროს ინფორმაციით, მომხდარზე გამოძიება, სისხლის სამართლის კოდექსის 240-ე მუხლის მეორე ნაწილით, რაც სამთო დაიწყო, რაც სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.
დაღუპულთაგან ყველაზე უმცროსი – გიორგი ბოჭორიშვილი 27 წლის იყო. მისმა ოჯახის ახლობელმა, „კვირის პალიტრასთან“ ახალგაზრდა მაღაროელის შესახებ ისაუბრა.
„გიოს გამორჩეულობაზე ლაპარაკის მერიდება, არადა, მართლა უსაყვარლესი ბიჭი იყო. გიორგის მამაც ძველი მაღაროელია, მან 30 წელი იმუშავა მაღაროში და სწორედ ამის გამო დაინვალიდდა; მამას შვილის მიწისქვეშ ჩაშვება არ უნდოდა – მე რა გავაკეთე, შენ რომ არ ჩახვიდე მიწაშიო, მაგრამ გიორგიმ 20 წლისა ასაკში შეირთო ცოლი და აიჩემა, მე უკვე ოჯახი მყავს, სხვა სამსახურს მაინც ვერ ვიშოვი, ამიტომ ოჯახის სარჩენად უნდა ვიმუშაოო…
მერე ისე მოხდა, რომ გიორგიმ და მისმა ცოლმა ერთმანეთს ვერ გაუგეს და გოგონა მშობლიურ რაიონში დაბრუნდა. გიორგიმ შესთავაზა, შენ თუ შვილის გაზრდას ვერ შეძლებ, კარგად დაფიქრდი, ბავშვს მე დავიტოვებ და გავზრდიო.
მოკლედ, გიორგიმ შვილი დაიტოვა და წლინახევრის შემდეგ ხელახლა დაქორწინდა. საოცრად კარგი გოგონა მოიყვანა ცოლად – ჭკვიანი, თბილი და ადამიანური. ბავშვი უკვე 6 წლის არის, საკუთარივით ზრდის. წყვილს კიდევ ორი შვილი შეეძინა, ერთი ახლა ორწლინახევრის არის, ერთიც – მხოლოდ წლის. გიორგი ამ სამ ბავშვს და დედ-მამას თავის ხელფასით ინახავდა, – შვილი ხომ კარგი იყო, მამაც სოცარად მოსიყვარულე და თბილი გამოდგა. ახლა კი ამ ოჯახმა ერთადერთი მარჩენალი დაკარგა, რომელმაც მხოლოდ 27 წელი იცოცხლა ამ ქვეყნად. ამ უბედურებით აღარ ვართ…
ამ დროს კი ადმიანისტრაცია გაიძახის, ჩვენი ბრალი არაფერი ყოფილაო. განა შეიძლება შახტი წელიწადში ორჯერ ინგრეოდეს? ერთი წელიც არ არის გასული მას შემდეგ, რაც ამ შახტში 4 ახალგაზრდა მაღაროელი დაიღუპა. მათ ის ურჩევნიათ, იმაზე იფიქრონ, გიორგის სამ პატარს როგორ დაეხმარონ”- აცხადებს დაღუპულის ახლობელი.
სრულად იხილეთ „კვირის პალიტრა”