შინაგან საქმეთა მინისტრის მოადგილე ნათია მეზვრიშვილი აცხადებს, რომ ნარკოპოლიტიკის ლიბერალიზაციაზე დაუსრულებელი საუბარი ნარკოდანაშაულს ახალისებს და ნარკოტიკების პროპაგანდას ახდენს.
ნათია მეზვრიშვილი ამბობს, რომ შსს ნარკოდანაშაულს შეურიგებელ ბრძოლას უცხადებს და ეს მიდგომა კიდევ უფრო გამკაცრდება. მისივე თქმით, შინაგან საქმეთა სამინისტროს პოზიციაა, რომ მძიმე ნარკოტიკებს დეკრიმინალიზაცია არ შეეხოს.
“ბოლო დღეების განმავლობაში გარკვეული ჯგუფები საუბრობენ, რომ თითქოს არსებობს შედარებით მავნე ან ნაკლებად მავნე ნარკოტიკული საშუალებები. მაგალითად “მეფედრონი” კლავს და სხვა სინთეტიკური საშუალებები, მაგალითად “ჰეროინი” არ კლავს. ასეთ მსჯელობებზე დაფუძნებული ნარკოპოლიტიკა, შსს-სთვის მკაფიოდ ვაცხადებ, რომ მიუღებელია. მიგჩნია, რომ ასეთი მსჯელობები, ისევე როგორც დაუსრულებელი საუბარი ნარკოპოლიტიკის ლიბერალიზაციაზე მხოლოდ და მხოლოდ ახალისებს ნარკოდანაშაულს, ახდენს ნარკოტიკების პროპაგანდას. ამიტომ ჩვენი ერთ-ერთი პრიორიტეტია ნარკოდანაშაულის წინააღმდეგ შეურიგებელი ბრძოლა”,- განაცხადა ნათია მეზვრიშვილმა.
შეგახსენებთ, რომ საქართველოს პარლამენტში ნარკოპოლიტიკის კანონპროექტის განხილვა 7 მაისს კიდევ ერთი თვით გადავადდა.
ბოლო დღეებში, საქართველოში ალაპარაკდნენ ახალი ნარკოტიკის შესახებ, რომელმაც არსებული ინფორმაციით უკვე რამდენიმე ადამიანის, მათ შორის ახალგაზრდების სიცოცხლე იმსხვერპლა. ეგრეთ წოდებული „მკვლელი მარილის“ (ეფედრინი) კავშირი ბოლო დღეებში დაღუპული ადამიანების სიკვდილთან დადასტურებული არ არის, თუმცა საზოგადოების ნაწილი ამ შესაძლებლობას აქტიურად განიხილავს. ექიმების ნაწილის მტკიცებით, კლინიკის მიხედვით (დაღუპულ ადამიანთა უმრავლესობა ძილში გარდაიცვალა) ახალი „მკვლელი“ ნარკოტიკი ეფედრინი არ არის, არამედ ოპიატია, რომელსაც ძილში სიკვდილი ახასიათებს. ის, სავარაუდოდ, ინტერნეტით იყიდება.