ომბუდსმენი – სასამართლოს გადაწყვეტილება ადასტურებს ეჭვებს, რომ დავით სარალიძის მკვლელობაში დამნაშავე პირები სრულად ვერ გამოვლინდნენ

უახლოეს პერიოდში სახალხო დამცველის აპარატი გამოძიების მასალებს სრულად შეისწავლის, – ამის შესახებ საქართველოს სახალხო დამცველმა ნინო ლომჯარიამ დღეს ბრიფინგზე განაცხადა.
მისი შეფასებით, სასამართლოს მიერ გამოტანილი განაჩენი ადასტურებს მომხდარი ტრაგედიის შემდეგ წარმოშობილ ეჭვებს, რომ გამოძიებამ გარდაცვლილი დავით სარალიძის მკვლელობაში დამნაშავე პირები სრულად ვერ გამოავლინა.
„გამოძიების საქმის მასალებზე დღეის შემდგომ გვექნება წვდომა, განაჩენის გამოტანის შემდეგ. უახლოეს პერიოდში სახალხო დამცველის აპარატი გამოძიების მასალებს სრულად შეისწავლის. თუმცა, ამ ეტაპისთვის შეგვიძლია განვაცხადოთ, რომ სასამართლოს მიერ გამოტანილი განაჩენი ადასტურებს მომხდარი ტრაგედიის შემდეგ წარმოშობილ ეჭვებს, რომ გამოძიებამ სარალიძის მკვლელობაში დამნაშავე პირები სრულად ვერ გამოავლინა. მიუხედავად იმისა, რომ გამოძიების მიმდინარეობისას დაზარალებული აღნიშნული მხარე ღიად აპელირებდა, გამოძიება, სხვა პირების მიერ მკვლელობის ფაქტზე, დღემდე არ დაწყებულა და პროკურატურა გამორიცხავდა მკვლელობაში სხვა პირების მონაწილეობას. სახალხო დამცველი მოუწოდებს პროკურატურას, დაუყოვნებლივ დაიწყოს გამოძიება მკვლელობაში მონაწილე სხვა დამნაშავეების გამოსავლენად. ასევე, ხაზგასმით მინდა აღვნიშნო, რომ ამ მიმართულებით გამოძიების დაწყების საფუძველი უკვე არსებობდა, ვინაიდან სასამართლო სხდომაზე გამოკვლეული ექსპერტიზის დასკვნით, დავით სარალიძეზე მიყენებული სასიკვდილო ჭრილობა არ იყო მიყენებული გამოძიებით მოპოვებული იარაღით“, – განაცხადა სახალხო დამცველმა.