ბუტა რობაქიძის დედამ, ია მეტრეველმა ტელეკომპანია „იმედის“ ეთერში გამოსვლისას პარლამეტის წინ მიმდინარე აქცია და მოვლენები შეაფასა. „მე ზაზა სალარიძეს, რა თქმა უნდა, სოლიდარობას ვუცხადებ. სრულად ვიზიარებ მის ტკივილს და ურთულეს მდგომარეობას, თუმცა მთელი დღის განმავლობაში ვიმეორებ მიზეზს, თუ რატომ არ ვიდექით იქ მე და დანარჩენი შვილმკვდარი ოჯახები, რომლებიც წლების განმავლობაში ვითხოვდით სამართალს და ვიბრძოდით უსამართლობის წინააღმდეგ.
სამწუხაროდ, ეს ადამიანი აღმოჩნდა ნაციონალური მოძრაობის იარაღი და მისი ეს ტკივილი უკვე გადაიზარდა აბსოლუტურად სხვა რაღაცაში – ეს არის ნაციონალური მოძრაობა, რომელსაც ამოძრავებს მხოლოდ რევანში, განსაკუთრებულად მომძლავრებული სურვილი დაბრუნდეს ხელისუფლებაში. არ აქვს მნიშვნელობა, როგორ მოახერხებს ამას, რა თქმა უნდა, ძალისმიერ მეთოდებს ვგულისხმობ, იმიტომ, რომ ისინი არჩევნების გზით ვეღარასოდეს დაბრუნდებიან ქვეყანაში და სწორედ ამ პროცესებს უდგას სათავეში ნაციონალური მოძრაობა“, – ეს განაცხადა ბუტა რობაქიძის დედამ ტელეკომპანია „იმედის“ ეთერში. „მე კარგად მახსოვს, როდესაც პროკურორმა შოთაძემ მას შეხვედრა შეუთვალა, ბატონი ზაზა არ წავიდა შეხვედრაზე კუპრავას გარეშე, რომელიც გვერდით უდგას. მას არც ერთი წამით არ ტოვებს კუპრავა, რომელიც არის ნაციონალური მოძრაობის ზონდერი და არაერთ კადრშია ასახული მისი ზონდერქმედებები…
კუპრავა იყო ის ადამიანი, რომელიც სწორედ დღესაც მართავს ამ პროცესებს. ეს იყო ჩემთვის ყველაზე მიუღებელი, რომ ამ ადამიანმა ზუსტად იცის, მის გარშემო ვინ დგანან, მაგრამ მან უარი არ თქვა ამაზე და ის განაგრძობს „ნაციონალური მოძრაობის“ გვერდით დგომას და სამართლის მოთხოვნას. მე მინდა, მას ვუთხრა, რომ არა ეს „ნაციონალური მოძრაობა“, პირველი მე ვიდგებოდი და დანარჩენი შვილმოკლული ოჯახები მის გვერდით და სრულიად საქართველოს საზოგადოება იქნებოდა იქ. თუმცა, ჩვენ ნათლად დავინახეთ, საითკენ მიდიოდა ეს პროცესები და საითკენ მიდის, ეს არის ნაციონალების გეგმა, სააკაშვილის მიერ მართული. მე მინდა, სარალიძეს ვუთხრა, რომ „ნაციონალური მოძრაობა“ კარგად გამოიყენებს და როცა დასჭირდება, ძალიან კარგად გაიმეტებს. არ გამოვრიცხავ, რომ ზუსტადაც ეს გააკეთონ, რაც გაჟღერდა. მთავარი მათთვის ის არის, მიაღწიონ თავიანთ მიზანს, ქვეყანაში მოახდინონ დესტაბილიზაცია და როგორმე ხელისუფლებაში დაბრუნდნენ. მე მინდა აღვნიშნო, რომ ერთ-ერთი მთავარი პრობლემა სწორედ ეს არის, რომ დღეს მართლაც ასი მოწმიდან მხოლოდ ოთხმა ითანამშრომლა და ხელს აფარებენ, ხმას არ იღებს ამდენი ადამიანი, საზოგადოების ამხელა ნაწილი, რომელიც შეესწრო ამ ფაქტს, თუნდაც ბავშვები და მათი მშობლები. ეს არის ყოვლად დაუშვებელი და იმედი მაქვს, რომ ახლა მაინც კეთილგონიერებას მოუხმობენ და ისინი ალაპარაკდებიან, სიმართლეს იტყვიან. მე მინდა ხაზი გავუსვა იმას, რომ ჩვენ აღარ ვართ იმ დროში, რაც გამოვიარეთ, თორემ დღეს როგორ იქნებოდნენ აჭიკჭიკებული ეს ბავშვები, კარგად ვნახავდით. კარგად მახსოვს და ახსოვს საზოგადოებას 14 წლის გიორგი ზერიკიძეს რა უქნეს, კარგად გვახსოვს, წამების ფონზე, როგორ იღებდნენ მათთვის საჭირო ჩვენებებს და როგორ ხოცავდნენ ხალხს ციხეებში, თუ არ მისცემდნენ იმ ჩვენებას, რაც მათ სჭირდებოდათ. ზუსტად ეს არის განსხვავება იმ დროსა და ამ დროში, რომ ძალისმიერად და ასეთი არაკანონიერი გზით, ვერც ხელისუფლება და ვერც პროკურატურა ვერ იღებს იმ მთავარ მოწმეებისგან ჩვენებებს, რაც აუცილებელია ამ საქმეში იმისთვის, რომ ფარდა აეხადოს ყველაფერს. თუმცა, მე კიდევ მინდა ხაზი გავუსვა, რომ დარწმუნებული ვარ, ძალიან მალე მოხდება სამართლის აღდგენა და ყველა დამნაშავე პასუხს აგებს. ამის პირობა საჯაროდ დადო პრემიერ-მინისტრმა, გადადგა პროკურორი, მთელი პარლამენტი მოწადინებულია და იქმნება კომისია… მე მინდა, პარალელი გავავლო ჩვენი უბედურებების პერიოდში, რა გვიქნეს ჩვენ, რა დღეში ვიყავით მაშინ. აი, ამდენი ახალგაზრდობა, რასაც დღეს ვხედავ, ნამდვილად არ იდგა ჩვენ გვერდით. მთელი 9 წელი ვიდექით ქუჩაში და სწორედ ეს იყო ჩვენი გულისტკივილი, რომ ახალგაზრდობა არ გამოდიოდა. მაშინ იყო საშინელი შიში და ტერორი, დღეს არის სრული თავისუფლება და სწორედ ამიტომ ბედავს „ნაციონალური მოძრაობა“ იმას, რაც დღეს ხდება რუსთაველზე. მე მინდა მათ ვუთხრა, რომ არ გაუვათ, რისი სურვილიც აქვთ, ვერასოდეს ვერ დაბრუნდებიან ხელისუფლებაში, ვერასოდეს ვეღარ მოაწყობენ არეულობას. აქ დგას მთელი საქართველო, მათ წინააღმდეგ. ძლივს მოვიშორეთ 2012-ში ეს შავი ჭირი და ჩვენ არ დავუშვებთ მათ დაბრუნებას. აი, ეს არის ჩემი მესიჯი მათ მიმართ და ნუ იყენებენ ამ გაუბედურებულ ადამიანს იარაღად, ნუ იყენებენ ამ სტუდენტებს თავიანთი ზრახვებისთვის“,- განაცხადა ია მეტრეველმა.