რუსეთის საპატრიარქოს საგარეო განყოფილების ხელმძღვანელი მიტროპოლიტი ილარიონი თბილისში, საქართველოს კათოლიკოს პატრიარქს ილია მეორეს შეხვდა. ამის შესახებ ინფორმაცია საქართველოს საპატრიარქომ გაავრცელა.
შეხვედრაზე მიტროპოლიტმა ილარიონმა პატრიარქს რუსული ეკლესიის სპეციალური წარგზავნილი ვლადიმერ ალექსანდროვი წარუდგინა, რომელიც რუსეთს სინდომა მიმდინარე წლის 14 მაისს დანიშნა.
როგორც პატრიარქის მდივანმა, დეკანოზმა მიქაელ ბოტკოველმა თქვა, შეხვედრაზე ასევე ისაუბრეს უკრაინის ადგილობრივი ეკლესიის რუსეთის მართლმადიდებელი ეკლესიისაგან გამოყოფის შესახებ. ამის შესახებ სააგენტო “ინტერპრესნიუსი” ბოტკოველზე დაყრდნობით წერს.
„უკრაინის ადგილობრივი ეკლესია სთხოვს მსოფლიო საპატრიარქოს, როგორც პირველ ეკლესიას, რომ რაიმე ზომები მიიღოს და დაეხმაროს უკრაინას ამ დამოუკიდებლობის მოპოვებაში. ამასთან დაკავშირებით რუსეთის საპატრიარქოს თავისი პოზიციები გააჩნია. ამიტომ ბრძანდებოდა მიტროპოლიტი ილარიონი (ალფეევი). მსგავსი კონსულტაციები გაიმართება მსოფლიო საპატრიარქოს წარმომადგენელთან. თუმცა, ჩვენ შეტყობინება ჯერ მათგან არ მიგვიღია. რუსეთის საპატრიარქო აცხადებს, რომ ალბათ კონსტანტინოპოლის საპატრიარქოც განახორციელებს ასეთივე ვიზიტს საქართველოში. ჯერ კონსტანტინოპოლის საპატრიარქოს ჩვენთვის არ მოუმართავს“, – განაცხადა მამა მიქაელმა.
ბოტკოველის თქმით, ამ თემასთან დაკავშირებით საქართველოს საპატრიარქოს პოზიცია “იქნება მოზომილი და ისეთი, როგორც ეკლესიები შეთანხმდებიან. რთული საკითხია ძალიან უკრაინა რა მოთხოვნასაც აყენებს. ამას კანონიკთური ნორმები განსაზღვრავს და ამიტომ ამ საკითხზე მსჯელობა რთული იქნება“, – განაცხადა პატრიარქის მდივანმა.