იყო თუ არა გაფიცვა მართული პროცესი – “მემანქანეს წამოსცდა, ეს ჩვენ არ გვინდოდა, დაგვავალესო”

„ერთ-ერთ მემანქანეს უკვე წამოსცდა, ეს ჩვენ არ გვინდოდა, ჩვენ დაგვავალესო, რომ გამოდით და ასეთი რამ ჩაიდინეთო“, – ამის შესახებ საქართველოს კულტურის პალატის ხელმძღვანელმა დავით ოქიტაშვილმა მედიაჰოლდინგ „კვირას“ პრესკლუბში განაცხადა.
დავით ოქიტაშვილი აცხადებს, რომ მემანქანეების გაფიცვის საქმე აუცილებლად უნდა იქნას გამოძიებული, რათა დადგინდეს, თუ ვინ იდგა გაფიცვის უკან.
„მეტროსთან დაკავშირებით მე მოვითხოვ, რომ ეს იქნას გამოძიებული. ვინ იდგა ამ ყველაფრის უკან? ეს ირაკლი პეტრიაშვილი იყო თუ სხვა, მე ვერ დავადებ ხელს ადამიანს, იმიტომ, რომ არ ვიცი… მემანქანეების გაფიცვაში ყველაზე სენსაციური იცით რა იყო? ეს ყველაფერი დაემთხვა ზუსტად იმ აქციებს, რომელიც პარლამენტთან მიმდინარეობდა, ეს საქმე აუცილებლად უნდა იქნეს გამოძიებული, რათა გაირკვეს ამ მემანქანეებს ვინ მართავდა. ერთ-ერთ მემანქანეს უკვე წამოსცდა, ეს ჩვენ არ გვინდოდა, ჩვენ დაგვავალესო, რომ გამოდით და ასეთი რამ ჩაიდინეთო. ეს იყო მიზანმიმართული დანაშაული იმ ადამიანების მიმართ, რომლებიც მეტროთი გადაადგილდებიან, როდესაც მეტროს აჩერებ, არის საბოტაჟი“, – განაცხადა დავით ოქიტაშვილმა.
მისივე ინფორმაციით, იყო მცდელობა, რომ მეტროს მემანქანეებთან ერთად, მაღაროელები და სასწრაფოს თანამშრომლებიც გაფიცულიყვნენ, თუმცა, მისივე თქმით, მათზე ზეგავლენის მოხდენა ვერ მოხერხდა.
„ასევე, იყვნენ ჩასულები ტყიბულში და უნდოდათ მაღაროელების გაფიცვა. მე შევხვდი ერთ-ერთ ადამიანს აქციაზე და მითხრა: დათო, შენ არ იცი ჩვენ რას გადავრჩითო. ანუ, მაღაროელები მიხვდნენ, თუ რაში უნდოდათ მათი გამოყენება.
მაღაროელებს ხელფასებიც ნორმალური აქვთ, უბრალოდ, როგორც ჩანს, ეს ვიღაცებს არ სიამოვნებთ. როცა მეტრო გაიფიცა, ეუბნებოდნენ მაღაროელებს, რომ თქვენც უნდა შეუერთდეთ მეტროს მემანქანეებსო… შემდეგ აპირებდნენ სასწრაფოების გაფიცვას, მაგრამ იქ ვერ შეძლეს ამის გაკეთება“, – აღნიშნა ოქიტაშვილმა და დასძინა, რომ ეეჭვება, ნორმალურად მოაზროვნე ადამიანი „ნაციონალების“ გვერდით იყოს.