ონლაინ სესხების კომპანიების მხრიდან, ინტერნეტბანკის მომხმარებელთა სახელისა და პაროლის შეგროვების ფაქტთან დაკავშირებით ინფორმაცია რამდენიმე წყაროდან მივიღეთ, – ამის შესახებ პერსონალურ მონაცემთა დაცვის ინსპექტორმა, თამარ ქალდანმა გადაცემა 2030-ში სტუმრობისას განაცხადა.
“შეტყობინება მივიღეთ ბანკების ასოციაციისგან, რამდენიმე ბანკისგან და მონაცემთა გაცვლის სააგენტოსგან, სადაც მსგავსი პრაქტიკის არსებობის შესახებ ინფორმაცია შევიდა და ერთ-ერთი კომპანიის შემოწმება დავიწყეთ. რისკი 2 ტიპის არსებობს. პირველი – ისეთ მონაცემებზე წვდომა, რომელიც კომპანიას კონკრეტული მიზნისთვის არ სჭირდება. მაგალითად, 2-3 წლის წინ საიდან რა შემოსავლებს იღებდით, რაში ხარჯავდით, ვის ურიცხავდით და ა.შ. მეორე – მათ უკვე იციან თქვენი ბარათის ნომერი და თუ ის ხელში არაკეთილსინდისიერ მესამე პირს ჩაუვარდა, ამ შემთხვევაში ფინანსებზე პირდაპირი წვდომის შესაძლებლობა არსებობს”, – განაცხადა ქალდანმა.
მისი თქმით, ონლაინ სესხების ყველა კომპანია ამ პრაქტიკას არ იყენებს.
“ეს ახალი მეთოდია, რომელიც ერთ-ერთმა კომპანიამ ალტერნატივის სახით გამოიყენა. საკითხი შესწავლის პროცესშია. ამიტომ, წინასწარ დასკვნებს ვერ გავაკეთებთ. არ ვარ დარწმუნებული, რომ ეს ერთადერთი კომპანიაა, რომელიც ამ მეთოდს იყენებს”, – განაცხადა პერსონალურ მონაცემთა დაცვის ინსპექტორმა.
როგორც მან აღნიშნა, ონლაინ სესხების საკითხი გარკვეულწილად არ რეგულირდება, მაგრამ ეს იმას არ ნიშნავს, რომ პერსონალურ მონაცემთა დაცვის, ან სხვა კანონი ონლაინ სესხების კომპანიებზე არ ვრცელდება.
“თუ დადგინდა, რომ ადგილი აქვს მონაცემების არაპროპორციულად დიდი მოცულობით შეგროვებას, ან ამ მონაცემების უსაფრთხოება სათანადოდ უზრუნველყოფილი არ არის, შესაძლოა, მათ კანონით გათვალისწინებული სანქცია დაეკისროთ და პერსონალური მონაცემების წაშლა დაევალოთ”, – განაცხადა ქალდანმა.
მისი თქმით, ამ ეტაპზე გამოვლენილი დარღვევები, ძირითადად, სესხის ამომღებ კომპანიებს ეხება.
“სესხის ამოღების მიზნით, კომპანიები ფინანსურ ინფორმაციას ისეთ პირებს უმჟღავნებენ, ვისგანაც სესხს ვერ ამოიღებენ. ყოფილა შემთხვევა, როცა სესხის არსებობის შესახებ ინფორმაცია, მსესხებლის მეზობლებისთვის და თანამშრომლებისთვის გაუმჟღავნებიათ. ბუნებრივია, კომპანიას აქვს ლეგიტიმური ინტერესი, მსესხებლისგან მისი კუთვნილი თანხის უკან დაბრუნება მოითხოვოს და მსესხებელს აქვს ვალდებულება, ფული დააბრუნოს, მაგრამ სესხის არსებობის შესახებ ინფორმაცია, კომპანიამ სხვა პირებს არ უნდა გადასცეს”, – განაცხადა თამარ ქალდანმა.