საქართველოს პარლამენტის ვიცე-სპიკერი ნინო წილოსანი სოციალურ ქსელში განცხადებას ავრცელებს. მისი ცნობით, „სტრატეგიული კვლევებისა და განვითარების ცენტრმა“ 15 000 ევროიანი გრანტის შესახებ განაცხადა, რაც ადამიანების მოსყიდვისა და შანტაჟის მცდელობაა. დეპუტატი დონორებს მიმართავს და მოუწოდებს, გამჭვირვალობის კანონპროექტს მხარი დაუჭირონ.
„გუშინ საქართველოს სტრატეგიული კვლევებისა და განვითარების ცენტრმა 15 000 ევროიანი გრანტი გამოაცხადა, ამავდროულად ადამიანების მოსყიდვის და დაშანტაჟების წარმოუდგენელი და თავზეხელაღებული მაგალითი შემოგვთავაზა.
ანუ არგუმენტების არ ქონის მიუხედავად, თუ კანონის წინააღმდეგ ხმას არ ამოიღებენ 15 000 ევროს ვეღარ მიიღებენ? ამაზე მეტად მდაბიო და შეურაცხმყოფელი შეთავაზება, ასე საჯაროდ მგონი ჯერ არავის გაუკეთებია საკუთარი თანამოქალაქეების მიმართ.
აუცილებლად მივმართავ ევროკავშირს ოფიციალურად – ამ ორგანიზაციას, იმისთვის არ ეძლევა გრანტის განხორციელების შესაძლებლობა, რომ ქართველი ხალხი აშანტაჟოს და თავისი პოლიტიკური პოზიცია მოახვიოს თავს! ეს ყველაფერი ნათლად გვიჩვენებს, თუ რამდენად უღირსად იყენებს ზოგიერთი არასამთავრობო ორგანიზაცია ყველაზე კეთილშობილურ პროექტებსაც კი მოვუწოდებ ყველა დონორს, დაუჭირონ მხარი გამჭვირვალობას და ნუ იქნებიან ამ სამარცხვინო ფაქტების თანამონაწილენი. იხილეთ მათი განაცხადი“, – წერს ნინო წილოსანი.