ფრაქცია „ქართული ოცნების“ თავმდჯომარის მამუკა მდინარაძის განცხადებით, გუშინ გვიან ღამე მან და სხვებმაც იცოდნენ, რომ დღევანდელი ასამბლეის სხდომა ბერძენ კოგელას უნდა წაეყვანა.
როგორც მდინარაძე განმარტავს, ის გარემოება, რომ რუსი დეპუტატი ვერ შეაჩერეს საზღვარზე უხერხულობას უქმნიდა უმრავლესობის წევრებს.
„ჩვენი ინფორმაცია ასეთი იყო, რომ ბერძენი სპიკერი რომელიც გენერალური მდივანია ამ ორგანიზაციის, წაიყვანდა სხდომას. ისედაც დიდ უხერხულობას გვიქმნიდა ის, რომ ფორმალური გარემოებებიდან გამომდინარე, რადგან ოკუპაციის შესახებ კანონი არ აქვს დარღვეული რუს დეპუტატს, ვერ აჩერებ საზღვარზე, ეს უხერხულობას ქმნიდა და გუშინაც გვეტყობოდა ეს უხერხულობა განცხადებებში. მაგრამ დღეს ახლა იქ რომ წამოსკუპტდეს ვიღაცა, რომელიც საოცარ განცხადებებს აკეთებს ჩვენი ქვეყნის წინააღმდეგ და მტერია, ეს ყოვლად მიუღებელია“, – განაცხადა მამუკა მდინარაძემ.
რაც შეეხება მომხდარზე პასუხისმგებლობის საკითხს, მდინარაძე ამბობს, რომ ამ ღონისძიებას თავისი ორგანიზატორი ჰყავს.
პარლამენტის სპიკერისთვის განკუთვნილი ადგილიდან, დელეგატებს დუმის დეპუტატმა სერგეი გავრილოვმა ქართველ დეპუტატებს რუსულად მიმართა და ზაქარია ქუცნაშვილს მოწვევისთვის მადლობა გადაუხადა.
რუსი დეპუტატის ქცევა „ევროპული საქართველოს“ წევრებმა გააპროტესტეს და მათ სპიკერატის ადგილი დაიკავეს.
მომხდარ ფაქტს გამოეხმაურა საქართველოს პრეზიდენტი სალომე ზურაბიშვილი, თამარ ჩუგოშვილი, არჩილ თალაკვაძე.
ფაქტზე, ბაქოში ვიზიტით მყოფმა, ირაკლი კობახიძემ პირველი კომენტარი გააკეთა.
საპარლამენტო ოპოზიცია კობახიძის პასუხისმგებლობის საკითხის დაყენებას მოითხოვს.
პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერ-მინისტრმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ.
სოფო კილაძის თქმით, სასწრაფოდ უნდა გაირკვეს, ვინ დაუშვა ეს და დადგეს მისი პოლიტიკური პასუხისმგებლობის საკითხი.
პარლამენტში მართლმადიდებლობის საპარლამენტთაშორისო ასამბლეის სხდომა შეწყდა.
თბილისი მართლმადიდებლობის საპარლამენტთაშორისო ასამბლეას მასპინძლობს. ღონისძიებაზე 25 ქვეყნის დელეგაციების წარმომადგენლები არიან ჩამოსულები.