ჩვენთვის ძალიან მნიშვნელოვანია თავისუფალი მედიასივრცე იქნას უზრუნველყოფილი, -განაცხადა “რუსთავი 2“-ის საქმესთან დაკავშირებით საქართველოს პრემიერ-მინისტრმა.
გიორგი კვირიკაშვილის თქმით, წინა წლებთან შედარებით, საკმაოდ დიდი განსხვავებაა მედიაგარემოში, ხოლო რაც შეეხება კონკრეტულად „რუსთავი 2“-ის საქმეს, კვირიკაშვილის განცხადებით, მთავრობა სასამართლოს საქმიანობაში ვერ ჩაერევა.
„ჩემი პრემიერობის და საგარეო საქმეთა მინისტრობის პერიოდში, ძალიან ბევრი მხარდამჭერი განცხადება გავაკეთე ამ არხის მიმართ. შევთავაზეთ ასევე სხვადასხვა ინსტრუმენტი – მედიასაბჭოს შექმნა, რომელიც სამოქალაქო საზოგადოების წევრების, არასამთავრობო ორგანიზაციებისა და მედიის სპეციალისტებით იქნებოდა შედგენილი, რომ უზრუნველყოფილი ყოფილიყო მისი სარედაქციო პოლიტიკა. ჩვენ არ გვაქვს მიზანი, ჩავერიოთ სარედაქციო პოლიტიკაში. არ ვერევით არავის სარედაქციო პოლიტიკაში. ამის საუკეთესო მაგალითი არის საზოგადოებრივი მაუწყებელი, რომელიც უფრო კრიტიკულია ზოგჯერ მთავრობის მიმართ, ვიდრე „რუსთავი 2“,- აღნიშნა პრემიერმა.
მისივე თქმით, ტელეკომპანიის ამ სახით შენარჩუნება ყველაზე მეტად მთავრობის ინტერესშია.