დღეს ,,პერიფერიული საზღვაო რეგიონების კონფერენციის” (,,CPMR”) ტრანსპორტის სამუშაო ჯგუფის დისტანციური შეხვედრა გაიმართა, რომელშიც სამეგრელო-ზემო სვანეთის სახელმწიფო რწმუნებულმა ალექსანდრე მოწერელიამ მონაწილეობა მიიღო. შეხვედრას სამუშაო ჯგუფის დირექტორი ბრუნო ოლივერი ხელმძღვანელობდა.
შეხვედრაზე განიხილეს პანდემიის პირობებში ტრანსპორტის აღდგენის საკითხები, მიმოიხილეს ,,COVID-19″ გავლენა ეკონომიკაზე, კონკრეტულად კი ტურიზმის და ტრანსპორტის სფეროებზე.
ონლაინ შეხვედრაზე საუბარი ასევე შეეხო ევროკავშირის წევრი ქვეყნების რეგიონების პორტებთან მჭიდრო თანამშრომლობის საკითხებს. გაიმართა საზღვაო ტრანსპორტით დაინტერესებული მხარეების პრეზენტაციები.
ორგანიზაციის წევრი რეგიონების ხელმძღვანელებმა განიხილეს ტვირთების გადაზიდვის, ტექნოლოგიების ხელმისაწვდომობის და ტრანსპორტის უსაფრთხოების საკითხები. საუბარი შეეხო ,,CPMR”-ის ტრანსპორტის სამუშაო ჯგუფის განახლებულ რეგულაციებს, პორტებზე ძირითადი ქსელის დაშვების და TEN-T რუქაზე ცვლილებების საკითხებს. ონლაინ კონფერენციის ბოლო ნაწილი კითხვა- პასუხის რეჟიმში წარიმართა.
სამეგრელო-ზემო სვანეთის რეგიონი ,,CPMR”-ის (Conference of peripheral maritime regions) წევრი მიმდინარე წლის გაზაფხულზე გახდა. ,,CPMR” წარმოადგენს საზღვაო რეგიონების კავშირს, რომელიც აერთიანებს 24 ქვეყნის 150 რეგიონს, როგორც ევროკავშირიდან, ასევე მის ფარგლებს გარეთ. კავშირი აერთიანებს ქვეყნებისა და რეგიონების 200 მილიონამდე მოქალაქეს. „CPMR” მხარს უჭერს წევრი რეგიონების განვითარებას.
სამეგრელო-ზემო სვანეთი ,,CPMR”-ის პოლიტიკური ბიუროს სრულუფლებიანი წევრია. რეგიონის წარმომადგენლობას უფლება აქვს მონაწილეობა მიიღოს გადაწყვეტილების მიმღები ორგანოს შეხვედრებში. წევრ რეგიონებს ასევე უფლება აქვთ გაწევრიანდნენ სპეციალურ სამუშაო ჯგუფებში, რომელიც ორგანიზაციის სხვადასხვა მიმართულებებზე მუშაობს.