რა თქმა უნდა, ოპოზიცია არჩევნების ლეგიტიმურობის საკითხს ვერ დააყენებს. მით უმეტეს, თუ ამ პროცესს განერიდნენ და მასში მონაწილეობა არ მიიღეს ანუ დარჩნენ იმ პოზიციაზე, რასაც დღეს აცხადებენ ღიად – ამის შესახებ გიორგი კახიანმა „იმედის“ გადაცემა „ღია ეთერში“ განაცხადა.
როგორც პარლამენტის თავმჯდომარის მოადგილე ამბობს, მისთვის ამაზე ბევრად მნიშვნელოვანია, როგორი დამოკიდებულება ექნება საზოგადოებას და საერთაშორისო მეგობრებს ამ საკითხთან მიმართებაში.
„ერთი მხრიდანაც და მეორე მხრიდანაც კითხვები არ შეიძლება იყოს. ის შეთანხმება 120/30-ზე ჩვენი ინიციატივა არ ყოფილა. ეს მათი შემოთავაზება იყო და საზოგადოებამ რომ იცოდეს, ეს სისტემა მაქსიმალურად პროპორციულ სისტემასთანაა მიახლოებული ანუ რას ნიშნავს ეს? თუ ცვლილებები განხორციელდება და დარწმუნებული ვარ განხორციელდება, საქართველოს პარლამენტში წევრების 80% პროპორციული წესით არჩეული იქნება და მხოლოდ 20% იქნება მაჟორიტარული სისტემით არჩეული“- აღნიშნა გიორგი კახიანმა.
მისი თქმით, ეს მიღწევა მნიშვნელოვანწილად და ძირითადად ხელისუფლების მიერ გადადგმული ნაბიჯების შედეგია და მთავრობა ბევრ კომპრომისზე წავიდა.
გიორგი კახიანი მიიჩნევს, რომ ოპიზიციას პროცესები ისევე მიჰყავს, როგორც წინა არჩევნებისას და ესაა დესტრუქცია, რადიკალიზმი, ძალადობა და მცდელობა, რომ შემდეგ არჩევნების ლეგიტიმურობის სკაითხი დადგეს.
„ეს ყველაფერი არის უსუსური მცდელობა. ეს გზა მათთვის არის დამაზიანებელი პირველ რიგში. ჩვენ ვნახეთ, ისინი ამ გზამ სადამდე მიიყვანა. ის რეიტინგები, რომელიც ცოტა ხნის წინ გამოქვეყნდა, ფაქტობრივად 3%-იანი პარტია მივიღეთ, ნაციონალური მოძრაობის 12 % და ა.შ. ეს იმ ფონზე, როცა მმართველ გუნდს საკმაოდ მაღალი მხარდაჭერა აქვს. ჩვენ არ მივცემთ მათ იმის საშუალებას, რომ თავისი ქმედებებებით ქვეყანა დააზიანონ, ისინი მხოლოდ თავის თავს დააზიანებენ“, -აღნიშნა კახიანმა.