„იმედის კვირა“ საკალმახე „ადმირალის“ და „ვილა ალგეთის“ მფლობელს გაესაუბრა. ერთ-ერთი ტელეკომპანიის ეთერში გაჟღერებული ვერსიით, თამარ ბაჩალიაშვილი თბილისიდან დედოფლიწყაროსკენ გადაადგილების მიზეზი უცნობ პირებთან წინასწარ დაგეგმილი შეხვედრა იყო. დასახელდა ორი ლოკაცია – მოქმედი საკალმახე „ადმირალი“ და „ვილა ალგეთი“, რომელიც 2015 წლის წყალდიდობის შემდეგ, აღარ ფუნქციონირებს. ამავე ვერსიით, 18 ივლისს, საკალმახე „ადმირალთან“ თამარ ბაჩალიაშვილი შეცდომით მიდის, რადგან რეალურად ეძებს „ვილა ალგეთს“, რომელსაც საკალმახესთან ერთად ეს ჯგუფი სასტუმროდაც მოიხსენიებს.
როგორც „იმედის“ გადამღებმა ჯგუფმა გაარკვია, „ვილა ალგეთინ“ არა სასტუმრო, არამედ გიორგი ღარიბაშვილის კუთვნილი კერძო სახლია, სადაც ის ოჯახთან – მეუღლესთან, ქალიშვილთან და შვილიშვილებთან ერთად ცხოვრობს. რამდენიმე დღის წინ, სახლის მიმდებარე ტერიტორია თამარ ბაჩალიაშვილის მშობლებმა ადვოკატებთან ერთად დაათვალიერეს. მასპინძელს იმაშიც არწმუნებდნენ, რომ გარდაცვალების შემდეგაც კი, თამარ ბაჩალიაშვილის ავტომობილს მის კუთვნილ ავტოფარეხში მალავდა. არადა, ადგილზეც ვამოწმებთ, რომ ავტოფარეხი მოქმედი დიდი ხანია არ არის, კარები ნახევრად იღება ისე, რომ მანქანა შიგნით ვერ შევა. სწორედ მსგავსი დაუსაბუთებელი ბრალდებების გამო გიორგი ღარიბაშვილის ოჯახი სასამართლოში ჩივილს გეგმავს.