ყველა ქვეყანაში, კონსენსუსი და ნდობა საზოგადოებაში არის პროგრესისა და დემოკრატიის საფუძველი, – განაცხადა ლიეტუვის პრეზიდენტმა, გიტანას ნაუსედამ ქართველ კოლეგასთან ონლაინსაუბრისას. ამის შესახებ ინფორმაციას ლიეტუვის პრეზიდენტის ადმინისტრაცია ავრცელებს.
როგორც განცხადებაშია აღნიშნული, ორი ქვეყნის პრეზიდენტებმა აღმოსავლეთ პარტნიორობის სამიტისთვის მზადებაზე, COVID-19-ის შეკავების ღონისძიებასა და საქართველოში შექმნილ პოლიტიკური ვითარებაზე ისაუბრეს.
„ლიეტუველმა საზოგადოებამ და პოლიტიკურმა პარტიებმა შეთანხმებას ეროვნული, სტრატეგიული მიზნებისა და ჩვენი წარმატების საფუძვლის შექმნით მიაღწიეს“, – განაცხადა გიტანას ნაუსედამ.
„სხვა განხილულ საკითხებს შორის იყო აღმოსავლეთ პარტნიორობის სამიტის მოსამზადებელი სამუშაო. პრეზიდენტმა გამოხატა მხარდაჭერა აღმოსავლეთ პარტნიორობის პოლიტიკაში საქართველოს აქტიურ პოზიციაზე. მან ასევე მადლიერება გამოხატა სამი ასოცირებული ქვეყნის – უკრაინის, მოლდოვისა და საქართველოს ძალისხმევისადმი, უფრო მჭიდრო პარტნიორობის შესაქმნელად. პრეზიდენტმა ხაზი გაუსვა, რომ მოტივირებული აღმოსავლელი პარტნიორების ერთიანი ხმა ევროპის დედაქალაქებში უფრო მტკიცედ ჟღერს. პრეზიდენტმა ასევე აღნიშნა, რომ მხარეებმა უნდა გამოიყენონ შესაძლებლობა და დაისახონ გრძელვადიანი ამბიციური მიზნები აღმოსავლეთ პარტნიორობის პოლიტიკური დღის წესრიგისთვის“, – აღნიშნულია ლიეტუვის პრეზიდენტის ადმინისტრაციის მიერ გავრცელებულ განცხადებაში.
გიტანას ნაუსედამ ასევე აღნიშნა, რომ ლიეტუვა მტკიცედ უჭერს მხარს საქართველოს ტერიტორიულ მთლიანობას, მის სუვერენიტეტს და ამ საკითხს საერთაშორისო შეხვედრებსა და ფორუმებზე აყენებს.
გიტანას ნაუსედამ ხაზი გაუსვა აღმოსავლეთ პარტნიორობის ქვეყნებისთვის კორონავირუსის საწინააღმდეგო ვაქცინაზე ხელმისაწვდომობის უზრუნველყოფის მნიშვნელობას.
ლიეტუვის პრეზიდენტმა სინანული გამოთქვა პანდემიის მიზეზით, 2020 წელს საქართველოში დაგეგმილი ვიზიტის გაუქმების გამო, თუმცა იმედი გამოთქვა, რომ მაისში შეძლებს საქართველოში ჩამოსვლას.