საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ჟოზეფ ბორელი ისრაელში კონფრონტაციის ესკალაციის შესახებ განცხადებას ავრცელებს.
„ისრაელში და პალესტინის ოკუპირებულ ტერიტორიებზე მძიმე ესკალაცია, ღაზასა და მის მიმდებარე ტერიტორიაზე ძალადობის გაზრდა უნდა შეწყდეს. ევროკავშირი შეშფოთებულია სამოქალაქო პირებს შორის დაღუპულთა და დაშავებულთა დიდი რაოდენობით, ბავშვების ჩათვლით. პრიორიტეტი სამოქალაქო პირების დაცვა უნდა იყოს. ყველა ძალისხმევა უნდა იყოს მიმართული სამოქალაქო მსხვერპლის თავიდან აცილებასა და დეესკალაციის მხარდაჭერაზე“, – ნათქვამია ჟოზეფ ბორელის განცხადებაში.
ევროკავშირში ასევე აცხადებენ, რომ „ჰამასისა“ და სხვა დაჯგუფებების მიერ ისრაელის მშვიდობიანი მოსახლეობის მიმართულებით რაკეტების გაშვება დაუშვებელია.
„მიუხედავად იმისა, რომ ისრაელის ლეგიტიმური საჭიროებაა, დაიცვას თავისი მშვიდობიანი მოსახლეობა, ეს პასუხი უნდა იყოს პროპორციული და ძალის გამოყენება მაქსიმალური თავშეკავებულობით უნდა მოხდეს. ევროკავშირი მოითხოვს ძალადობის დაუყოვნებლივ დასრულებას“, – ნათქვამია განცხადებაში.