ხშირად პოლიტიკოსები საუბრობენ არა პოლიტიკურ პროგრამებზე, კანონპროექტებზე, არამედ მარტივად ვარჯიშობენ ერთმანეთის შეურაცხყოფასა და გაქილიკებაში, ასეთი პოლიტიკური ფიგურები, რომლებსაც არა აქვთ ჩამოყალიბებული პოლიტიკური პრიორიტეტები, ბუნებრივია, ნებისმეირ თემას ეძებენ ხოლმე, – ასე ეხმაურება საქართველოს პრეზიდენტი გიორგი მარგველაშვილი პოლიტიკოსების განცხადებას, სადაც საქართველოში ჩატარებულ სამხედრო წვრთნებს სახიფათოს უწოდებენ.
როგორც მარგველაშვილმა ქუთაისში, ადგილობრივი ტელეკომპანიის პირდაპირ ეთერში განაცხადა, მსგავსი წვრთნები საქართველოში გასულ წლებშიც ტარდებოდა და ეს ქვეყნის თავდაცვისუნარიანობისთვის მნიშვნელოვანია.
„თურმე, ეს წვრთნები, რომელიც მნიშვნელოვანია საქართველოს თავდაცვის უნარიანობისთვის, პრობლემურია. რატომ არის პრობლემური. დამოუკიდებელი ქართული სახელმწიფოა, ჩემს ტერიტორიაზე ვახორციელებ მოკავშირეებთან ერთად წვრთნებს. ვინმეს წინააღმდეგ არის ეს მიმართული? აქ არის მარტივი ლოგიკა. მთელი ეს თემები გაცოცხლდა მას შემდეგ, რაც ცნობილი გახდა არჩევნების თარიღი. ბევრმა პოლიტიკოსმა ჩამოაყალიბა თავისი საშინაო და საგარეო პრიორიტეტები . ხშირად პოლიტიკოსები საუბრობენ არა პოლიტიკური პროგრამებზე, კანონპროექტეზე, ისინი მარტივად ვარჯიშობენ ერთმანეთის შეურაცხყოფასა და გაქილიკებაში. ასეთი პოლიტიკური ფიგურები, რომლებსაც არა აქვთ ჩამოყალიბებული პოლიტიკური პრიორიტეტები, არც შიგნით არც გარეთ, ბუნებრივია, ნებისმიერ თემას ეძებენ ხოლმე. მინდა საქართველოს მოსახლეობას მოვახსენო, რომ ასეთივე წვრთნები ჩატარდა შარშან ძალიან მშვიდობიანდ. ეს წვრთნები მიმართული იქითკენ, რომ გაძლიერდებს ჩვენი ქვეყნის თავდაცვისუნარიანობა. ჩვენ უაღრესად ფრთხილად უნდა ვიყოთ. აწონ- დაწონილი უნდა იყოს თითეული ჩვენი სიტყვა, მაგრამ ეს არ ნიშნავს, რომ ჩენი ქვეყნის სუვერენიტეტი რაიმე ფორმით დავთმოთ და შევლახოთ. არანაირად არ ვამართლებ რუსეთის მიმართ აგრესიულ რიტორიკას, მაგრამ სადაც არის საქართველოს საშინაო ინტერესები და უფლებები, იქ ენის მოჩლექვა არ შეიძლება“, – განაცხადა გიორგი მარგველაშვილმა.