რაც არ უნდა სასაცილო და პარადოქსული იყოს, მაშინდელი პენიტენციური სისტემის მთავარი შემქმნელი დღევანდელ სისტემას უწუნებს რაღაცებს, – ამის შესახებ მამუკა მდინარაძემ „ქართული ოცნების“ ოფისში ჟურნალისტებთან საუბრისას განაცხადა. მმართველი პარტიის აღმასრულებელი მდივნის თქმით, დღევანდელი პენიტენციური სისტემა, 2012 წლამდე არსებული ვითარებისგან ისე განსხვავდება, როგორც ცა და დედამიწა და პატიმრებს ისე ეპყრობიან, როგორც ევროპის წამყვან ქვეყნებში, მიხეილ სააკაშვილს კი საფრთხე არ ემუქრება.
„ძალიან მიმძიმს ამ თემაზე საუბარი, მაგრამ მაგიდაზე „გადასკოჩილი“ ბიჭების გაუპატიურების ავტორები და შემკვეთები ძალადობასა და ადამიანის უფლებებზე ლაპარაკობენ. ეს ხდება ამ ქვეყანაში სამწუხაროდ. და „ფეიკები“ იდგმება იმისთვის, რომ ცოტა მაინც გაანეიტრალონ ეს კონტრასტი, რაც შეუძლებელია. და შეუძლებელია დღევანდელ სისტემაში ვინმეს რამე დაემართოს, მათ შორის იმ სისტემის შემქმნელ ადამიანს“, – განაცხადა მდინარაძემ.
მისივე თქმით, არჩევნების დღის მოახლოებასთან ერთად „ფეიკების“ გავრცელება გამძაფრდება, რათა „ნაციონალური მოძრაობის“ მხარდამჭერებში მუხტი გაიზარდოს.