თბილისში, თავისუფლების მოედანზე, საქართველოს დამოუკიდებლობის დღისადმი მიძღვნილი ღონისძიების ნაწილი უკრაინაში მიმდინარე ომზე საუბარს დაეთმო. დედაქალაქის მთავარ მოედანზე უკრაინელი ხალხის მიმართ სოლიდარობა და მხარდაჭერა კიდევ ერთხელ გამოიხატა.
„დღეს, მსოფლიო უკრაინელი ხალხის წარმოუდგენელი თავგანწირვის მომსწრეა. ომი დაუნდობელია ბავშვებისა და ქალებისადმი. არაფერი ამართლებს მშვიდობიანი ხალხისადმი აგრესიას, რაც საქართველომ არაერთხელ გამოსცადა საკუთარ თავზე. თავისუფლებისკენ სწრაფვას წინ ვერაფერი დაუდგება. დღეს ამის მაგალითია უკრაინა. ასე ვიცხოვრეთ ჩვენ, ქართველებმა, საუკუნეების განმავლობაში და ჩვენი სისხლით გაჟღენთილი ისტორიით მოვედით დღემდე. ცივილიზებული სამყარო თავისუფლების მოყვარე ერების გვერდით დგას. ჩვენი დამოუკიდებლობის დღეს, კიდევ ერთხელ, სოლიდარობასა და პატივისცემას გამოვხატავთ უკრაინელი ხალხის მიმართ. დიდება უკრაინას! დიდება გმირებს! დიდება თავისუფლებას!“, – განაცხადა ღონისძიების წამყვანმა.