მოძრაობა „სირცხვილიამ“, ფაქტის გამოაშკარავების შემდეგ, თავისი Facebook-გვერდიდან რუსეთიდან მოქმედი ადმინისტრატორი ჩახსნა.
მანამდე „სირცხვილიას“ Facebook-ის ოფიციალური გვერდის გამჭვირალობის გრაფაში მითითებული იყო 22 ადამიანი, რომლებიც მოძრაობის ვებგვერდს მართავდნენ. მათ შორის 20 საქართველოდან, ერთი რუსეთიდან და ერთიც შეერთებული შტატებიდან.
მას შემდეგ, რაც „სირცხვილიას“ რუსეთიდან მოქმედი ადმინის შესახებ ინფორმაცია გახდა ცნობილი, მოძრაობის სოციალური ქსელიდან რუსეთიდან და აშშ-დან მოქმედი ადმინები ჩახსნეს. ასევე შეამცირეს საქართველოში მყოფი ადმინების რიცხვი და გვერდს ამჟამად მხოლოდ საქართველოდან 9 ადმინი მართავს.
„სირცხვილიამ“ გაავრცელა განცხადება, რომლის მიხედვითაც, Facebook-გვერდზე, ერთ-ერთი ადმინის რუსეთიდან დაფიქსირების მიზეზი სასაათო სარტყელის არევაა.
„ვეხმაურებით „პოსტივისა“ და „იმედის“ „ექსკლუზივს“, „სირცხვილიას“ ფეისბუქგვერდის რუსეთიდან მართვის შესახებ. გვერდზე სხვადასხვა ტიპის წვდომა ჰქონდა 20-ზე მეტ ადამიანს/ორგანიზაციას/სარეკლამო ანგარიშს. ერთ-ერთმა ამ ექაუნთთაგანმა, როგორც ჩანს, სასაათო სარტყელის ან რეგიონის მითითების დროს მონიშნა რუსეთი (გაითვალისწინეთ ისიც, რომ მეტას გეოლოკაცია ჯერ კიდევ არ მუშაობს გამართულად და შეიძლება თქვენს მეგობრებშიც შეგხვედრიათ ფოთი რომ ბრაზილიას ეკუთვნის და ოზურგეთი მექსიკას). ექაუნთი უკვე წაშლილია გვერდიდან და დავტოვეთ მხოლოდ რამდენიმე ანგარიში, რომელსაც გვერდზე წვდომა შეუნარჩუნდა. მივმართავთ „პოსტვ-ისა“ და ტელეკომპანია იმედს, თავი დაანებეთ სამარცხვინო სპეკულაციებს და რუსული კვალის ძიება საკუთარ კომპანიებში დაიწყეთ“, – წერია „სირცხვილიას“ განცხადებაში.