ლობისტების დაქირავებაში მიუღებელი არაფერია, ოჯახისთვის მიხეილ სააკაშვილის სიცოცხლე არის უმთავრესი, – ასე გამოეხმაურა „ნაციონალური მოძრაობის“ წევრი, ხატია დეკანოიძე ინფორმაციას, რომლის თანახმად, ექსპრეზიდენტი მიხეილ სააკაშვილის დედამ, გიული ალასანიამ ლობისტური კომპანია დაიქირავა.
„არ დაგვავიწყდეს, მიხეილ სააკაშვილი არის შვილი, მამა, რა თქმა უნდა, მათთვის ეს საკითხი გასულია ყოველგვარი პოლიტიკური ჭრილიდან, ამიტომ, „ქართულმა ოცნებამ“ თავად მოიკითხოს ბიძინა ივანიშვილის ლობისტური კომპანიები, რომლებიც ბიძინა ივანიშვილის კაპიტალს იცავენ. ამერიკაში საქართველოს ელჩი პირადად არის ამით დაკავებული. ამიტომ სკანდალს იქ ნუ ხედავენ, სადაც არ არის, დაინახონ იქ, რომ საქართველოს მესამე პრეზიდენტი შეიძლება მალე გარდაიცვალოს“, – განაცხადა ხატია დეკანოიძემ.
ცნობისთვის, ფრაქცია „ქართული ოცნების“ თავმჯდომარე მამუკა მდინარაძემ განაცხადა, რომ ფლობს ინფორმაციას, იმის თაობაზე, რომ გიული ალასანია აფორმებს კონტრაქტს ლობისტურ კომპანიასთან, რომელიც იღებს პასუხისმგებლობას, გაუწიოს პიარკამპანია სააკაშვილის გადაყვანას ჰუმანიტარული მისიით.