კანდიდატის სტატუსით იწყება და მთავრდება ყველა შეხვედრა. საქართველოს უპირველესი მიზანია წელს კანდიდატის სტატუსის მიღება, – ამის შესახებ საქართველოს საგანგებო და სრულუფლებიანმა ელჩმა, ბელგიის სამეფოსა და ლუქსემბურგის დიდ საჰერცოგოში, ვახტანგ მახარობლიშვილმა ჟურნალისტებს ბრიუსელში განუცხადა.
მან ქართული დელეგაციის ვიზიტი შეაფასა და აღნიშნა, რომ მომავალ კვირას საქართველოს საგარეო უწყების ხელმძღვანელი გამართავს შეხვედრებს. მინისტრი შეხვდა კოლეგებსა და ევროკომისრებს.
„კანდიდატის სტატუსით იწყება და მთავრდება ყველა შეხვედრა. წელს კანდიდატის სტატუსის მიღება საქართველოს უპირველესი მიზანია. ქართულმა მხარემ ყველაფერი უნდა გააკეთოს, რომ ევროკომისიამ შესაბამისი დასკვნა მოამზადოს და წლის ბოლოს ევროპულმა საბჭომ საქართველოსთვის კანდიდატის სტატუსის მინიჭებაზე გადაწყვეტილება მიიღოს. პოლიტიკურ დონეზე საგარეო საქმეთა მინისტრის ვიზიტის ფარგლებში საუბარი იქნება ამ პროცესზე.
გაზაფხულის ბოლოს ევროკომისია ზეპირსიტყვიერ ანგარიშს წარუდგენს ევროპულ საბჭოს და შემდგომ წერილობითი ანგარიშის წარმოდგენა იგეგმება. ძალიან მნიშვნელოვანია რეგულარული და მუდმივი კომუნიკაცია ევროპელ პარტნიორებთან. საუბარი იქნება 12 რეკომენდაციის იმპლემენტაციაზე – როგორ სრულდება, სად ვართ და რა იგეგმება, რამდენიმე თვის განმავლობაში.
ძალიან კარგი ბმაა, რადგან ამ კვირაში გვქონდა სამუშაო შეხვედრები და მომავალ კვირას საქართველოს საგარეო უწყების ხელმძღვანელი გამართავს შეხვედრებს. მინისტრი შეხვდა კოლეგებს და მთელ რიგ ევროკომისრებს სხვადასხვა სექტორული მიმართულებით, მაგრამ ასევე შეხვედრები გაიმართება ევროკავშირის სხვა ინსტიტუტებშიც. არ გავუსწრებ მოვლენებს, მაგრამ პროგრამა საკმაოდ დატვირთულია. ძალიან საჭირო და დროული ვიზიტია“, – განაცხადა მახარობლიშვილმა.
საქართველოს ევროკავშირთან ურთიერთობების ახალ ეტაპზე გადასასვლელად და კანდიდატის სტატუსის მისაღებად ევროპის პოლიტიკურ ცენტრში შეხვედრები მიმდინარეობს. უწყებათაშორისი ვიზიტი ბრიუსელში ყველა მნიშვნელოვან საკითხს შეეხო, რაც საქართველოში მიმდინარე რეფორმებს უკავშირდება. დელეგაციაში არიან პარლამენტის, იუსტიციის, საგარეო საქმეთა სამინისტროებისა და მთავრობის ადმინისტრაციის წარმომადგენლები.