შინაგან საქმეთა სამინისტრო პარტია “ეროვნული ფორუმი”- წევრის ბრალდებას ეხმიანება. როგორც ოპოზიციის წევრი აცხადებს ვაკე-საბურთალოს პოლიციის უფროსმა მის შვილს ფიზიკური შეურაცხყოფა მიაყენა.
გთავაზობთ შინაგან საქმეთა სამინისტროს საპასუხო განცხადებას.
“გვსურს, გამოვეხმაუროთ მიმდინარე წლის 21 თებერვალს თბილისის საკრებულოს ერთ-ერთი წევრის მიერ მასობრივი ინფორმაციის საშუალებებით გაკეთებულ განცხადებებს, სადაც იგი შსს-ს თბილისის პოლიციის დეპარტამენტის ვაკე-საბურთალოს სამმართველოს უფროსს, ავთანდილ გალდავას თავისი შვილის – გ.დ.-სთვის ფიზიკური შეურაცხყოფის მიყენებაში ადანაშაულებს.
იმისთვის, რომ არ მოხდეს საზოგადოების მიზანმიმართულად შეცდომაში შეყვანა, აღნიშნულ საქმესთან დაკავშირებით განვმარტავთ:
შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს სამმართველოს თანამშრომლები ერთ-ერთ სისხლის სამართლის საქმესთან დაკავშირებით ატარებდნენ საგამოძიებო მოქმედებებს, რომლის ფარგლებშიც მოხდა გ. დ.-სთან გასაუბრება.
როგორც შსს-ს გენერალურ ინსპექციას გ.დ.-მ ოდნავ მოგვიანებით განუცხადა (აღნიშნული დაფიქსირებულია გასაუბრების შესახებ ოქმში და ხელმოწერილია მის მიერ), ვაკე-საბურთალოს სამმართველოს უფროსმა ავთანდილ გალდავამ მას პოლიციის შენობაში გაყოლა მოსთხოვა. გ.დ.-ს თქმით, ამასთან დაკავშირებით კითხვები გაუჩნდა მის მეგობარს – ლ.ტ.-ს, რის შემდეგაც ავთანდილ გალდავამ ამ უკანასკნელს ფიზიკური შეურაცხყოფა მიაყენა და თავად იგი იძულებით შეიყვანა პოლიციის შენობაში.
პოლიციის სამმართველოს შიდა და გარე პერიმეტრზე დამონტაჟებული ვიდეოკამერების სრული ჩანაწერებიდან ირკვევა, რომ გ.დ.-ს მიერ შსს-ს გენერალური ინსპექციისთვის მიცემული ჩვენების ეს ნაწილი სრულებით არ შეესაბამება სიმართლეს.
ამასთან, მაღალი საზოგადოებრივი ინტერესიდან გამომდინარე, შევნიშნავთ, რომ 1990 წელს დაბადებული გ.დ. წარსულში არაერთხელ იყო ნასამართლევი, მათ შორის, ყაჩაღობის, ცეცხლსასროლი იარაღის მართლსაწინააღმდეგო შეძენა-შენახვის, ცეცხლსასროლი იარაღის გამოყენებით ჩადენილი ხულიგნობის და უცხო ქვეყნის მოქალაქის ცემის ბრალდებით. გ.დ. ამჟამად პირობითი მსჯავრის ქვეშ იმყოფება.
პოლიციის შენობის შიდა და გარე პერიმეტრზე დამონტაჟებული ვიდეოკამერების ჩანაწერებიდან ასევე ირკვევა, რომ გ.დ.-მ სამმართველოში 14 წუთი დაჰყო.
გამოსვლისას მას გარეგნული დაზიანების არანაირი კვალი არ აღენიშნებოდა.
პოლიციის სამმართველოდან გამოსული გ.დ. თავის ადვოკატს შეხვდა. ხანგრძლივი განსჯის შემდეგ (რაც ასევე დასტურდება ვიდეოჩანაწერებით), გ.დ.-მ ადგილზე საპატრულო ეკიპაჟი და სასწრაფო სამედიცინო დახმარების ბრიგადა გამოიძახა და განაცხადა, რომ ვაკე-საბურთალოს სამმართველოს უფროსმა მას ფიზიკური შეურაცხყოფა მიაყენა. სასწრაფო სამედიცინო ბრიგადასთან საუბრისას გ.დ.-მ აღნიშნა, რომ უჩიოდა ტკივილს მუცლის არეში და დაჟინებით მოითხოვა ჰოსპიტალში გადაყვანა.
აღნიშნულ ფაქტთან დაკავშირებით, ჭეშმარიტების დადგენის მიზნით, მიმდინარეობს გამოძიება, რომლის შედეგები საზოგადოებისთვის ცნობილი გახდება.”– აღნიშნულია განცხადებაში.