ე.წ. ციანიდის საქმეზე მამა გიორგი მამალაძე დაიკითხა.
როგორც დაკითხვის შემდეგ პროკურორმა ზვიად გუბელაძემ ჟურნალისტებთან საუბრისას განაცხადა, მამა გიორგი მამალაძემ დღევანდელ დაკითხვაზე ვერც ერთ კრიტიკულ კითხვას ვერ უპასუხა.
”ბრალდებულმა ვერც ერთ კრიტიკულ შეკითხვას ვერ გასცა პასუხი. მის ნაცვლად ყოველ კითხვაზე პასუხს ადვოკატები სცემდნენ, რის გამოც მათ არაერთი შენიშვნა მიიღეს. ბრალდებულმა ვერ აგვიხსნა, რატომ ინტერესდებოდა ის ციანიდის მომწამვლელობის ეფექტით, თუ ის არ აპირებდა მკვლელობას, ასევე, რატომ ინტერესდებოდა თუ ვინ ჭამდა ტკბილს. მას შემდეგ, რაც ბრალდებული მიხვდა, რომ აბსურდული იყო შორენა თეთრუაშვილის თვითმკვლელობის მიზანი, მან დღეს შეცვალა ვერსია და აღნიშნა, თითქოს არ იცოდა, აპირებდა თუ არა შორენა თეთრუაშვილი თვითმკვლელობას”, – განაცხადა ზვიად გუბელაძემ.
დეკანოზი გიორგი მამალაძე 2017 წლის 10 თებერვალს დააკავეს. პროკურატურის ინფორმაციით, გამოძიება 2017 წლის 2 თებერვალს ერთ-ერთი მოქალაქის განცხადების საფუძველზე დაიწყო, რომელმაც საქართველოს პროკურატურას მიმართა და მიუთითა, რომ მისმა ნაცნობმა, მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს მაღალი იერარქიის სასულიერო პირი უნდა მოეწამლა. დეკანოზი წარდგენილ ბრალდებაში თავს დამნაშავედ არ ცნობს.