დეკანოზ გიორგი მამალაძის საქმის პროკურორი ზვიად გუბელაძე დარწმუნებულია, რომ ბრალდების მხარის მტკიცებულებებით შეძლეს მოსამართლისა და საზოგადოების დარწმუნება და დაკავებული დეკანოზი გასამართლდება, როგორც ანგარებით მკვლელობის მომზადებაში ასევე ცეცხლსასროლი იარაღის და საბრძოლო მასალის მართლსაწინააღმდეგო შენახვაში.
“ჩვენ დავკითხეთ ასზე მეტი მოწმე, წარვადგინეთ უტყუარი მტკიცებულებები, გამოვიკვლიეთ 10 ტომი წერილობითი მტკიცებულებები, მათ შორის აუდიო-ვიდეო ჩანაწერები, ექსპერტიზის დასკვნები, ექსპერტიზის შედეგად აღდგენილი აუდიო-ვიდეო ჩანაწერები და სხვა სახის დოკუმენტები.
ეს უტყუარი მტკიცებულებები გვაძლევს იმის თქმის საფუძველს, რომ მოსამართლე დავარწმუნეთ გიორგი მამალაძის ბრალეულობაში.
შესაბამისად, საზოგადოებასაც ვარწმუნებთ, რომ აღნიშნულ სისხლის სამართლის საქმეზე მოსამართლე გამოიტანს ერთადერთ სწორ გადაწყვეტილებას და გიორგი მამალაძეს სცნობს დამნაშავედ როგორც ანგარებით მკვლელობის მომზადებაში, ასევე ცეცხლსასროლი იარაღის და საბრძოლო მასალის უკანონო შეძენა შენახვაში”, – განაცხადა გუბელაძემ.