სენაკში მრავალეროვნული სამხედრო სწავლება – Agile Spirit 2018 დაიწყო

სენაკში, II ქვეითი ბრიგადის ბაზაზე, საერთაშორისო სამეთაურო-საშტაბო სწავლების – “Agile Spirit 2018”-ის გახსნის საზეიმო ცერემონიალი გაიმართა. მრავალეროვნულ სამხედრო სწავლებაში ნატო-ს წევრი და პარტნიორი 10 ქვეყანა მონაწილეობს.
სამეთაურო-საშტაბო სწავლების გახსნა სამხედრო მოსამსახურეებს საქართველოს თავდაცვის მინისტრმა, ლევან იზორიამ მიულოცა და წვრთნების სტრატეგიულ მნიშვნელობაზე გაამახვილა ყურადღება. სწავლების გახსნის ცერემონიალი საქართველოს სახელმწიფო ჰიმნის შესრულებით დაიწყო, რის შემდეგაც საბრძოლო მოქმედებებში და სამსახურებრივი მოვალეობის შესრულებისას დაღუპულ სამხედრო მოსამსახურეთა ხსოვნას წუთიერი დუმილით პატივი მიაგეს.
როგორც “კვირას” თავდაცვის სამინისტროდან აცნობეს, საერთაშორისო სამეთაურო-საშტაბო სწავლება 1 სექტემბრიდან 11 სექტემბრის ჩათვლით, ქალაქ სენაკში, მეორე ქვეითი ბრიგადის ბაზაზე ჩატარდება. სწავლება საქართველოს შეიარაღებული ძალებისა და აშშ-ის საზღვაო ქვეითთა კორპუსის ევროპული სარდლობის ლიდერობით განხორციელდება. საერთაშორისო წვრთნებს სახმელეთო ჯარების დასავლეთ სარდალი, ბრიგადის გენერალი გიორგი მათიაშვილი ხელმძღვანელობს.
საერთაშორისო სამეთაურო-საშტაბო სწავლება – „Agile Spirit 2018“ საქართველოში მერვედ იმართება და კომპიუტერული სიმულაციური სისტემების (JCATS/MTWS) მხარდაჭერით, ძალების მიზიდვის გარეშე განხორციელდება. სწავლებას მხარს დაუჭერს „ნატო-საქართველოს შეფასების ერთობლივი ცენტრი“ (JTEC), სახმელეთო ჯარების დასავლეთ სარდლობა, სპეციალური ოპერაციების ძალები, ავიაციისა და საჰაერო თავდაცვის სარდლობა და შინაგან საქმეთა სამინისტროს სანაპირო დაცვა.
სწავლების სცენარი თავდაცვის, შეტევისა და სტაბილურობის ოპერაციებს ემყარება. 2017 წელთან შედარებით, სადაც ნატო-ს წევრი და პარტნიორი 7 ქვეყანა იყო წარმოდგენილი, წლევანდელ სწავლებაში ნატო-ს წევრი და პარტნიორი 10 ქვეყანა მიიღებს მონაწილეობას (237 სამხედრო მოსამსახურე), ესენია: საქართველო, აშშ, ბულგარეთი, რუმინეთი, ლატვია, საბერძნეთი, უკრაინა, თურქეთი, ჩეხეთი, ესტონეთი.
„Agile Spirit 2018“-ის მიზანია : ნატო-ს სწრაფი რეაგირების ძალების შემადგენლობაში, ერთობლივ ოპერაციებში ან კრიზისებზე რეაგირებისათვის მზადყოფნის მიზნით, ბრიგადის დონეზე სამეთაურო-საშტაბო სწავლების დაგეგმვა და ჩატარება; ურთიერთთავსებადობის დახვეწა, სწავლებაში მონაწილე ქვედანაყოფებისა და სამეთაურო რგოლის ოპერატიული შესაძლებლობების გაუმჯობესება, ოპერაციების დაგეგმვისა და აღსრულების დროს, რეალურ დროში და მრავალეროვნულ გარემოში.