ინდონეზიის კატასტროფების მართვის ეროვნული საბჭოს მონაცემებით, კუნძულ სულავესზე 28 სექტემბერს მომხდარი მიწისძვრისა და ცუნამის გამო დაღუპულთა რაოდენობამ 1 571-ს მიაღწია. სამაშველო სამუშაოები ამ დრომდე გრძელდება. ხელისუფლება ათასობით ცხედრის გამო, ეპიდემიის საფრთხეზე საუბრობს. ამის შესახებ Aljazeera წერს.
„აღმოჩენილი ცხედრების უმეტესობა ძალიან ცუდ მდგომარეობაშია, რაც ინფიცირების საფრთხეს ქმნის. ადამიანებს, ვისაც ცხედრები ამოაქვთ, ვაქცინაცია უკვე ჩაუტარდათ, თუმცა ძალიან რთულია რიგითი მოქალაქეების კონტროლი. ხალხი საფრთხის წინაშეა“ – ამბობს სამძებრო და სამაშველო სამსახურის წარმომადგენელი იუსუფ ლატიფი.
7,4 მაგნიტუდის სიმძლავრის მიწისძვრა ინდონეზიაში 28 სექტემბერს მოხდა. ძლიერმა მიწისქვეშა ბიძგებმა ცუნამი გამოიწვია. უგზო-უკვლოდ დაკარგულებად ითვლება 113 ადამიანი. დაშავებულთა რაოდენობა კი 2500-ს აღწევს.
70 ათასამდე ადამიანი უსახლკაროდ დარჩა. 3 ოქტომბერს, კუნძულ სულავესზე ვულკანი სოპუტანიც გააქტიურდა.