ფრაქცია „ქართული ოცნება – ძლიერი საქართველოსთვის“ თავმჯდომარე, ბიძინა გეგიძე, ეხმაურება ეკა ბესელიას გადაწყვეტილებას იურიდიულ საკითხთა კომიტეტის თავმჯდომარის პოზიციის დატოვების შესახებ.
„ქალბატონო ეკა, პირველ რიგში, გიდასტურებთ დიდ პატივისცემას. დღევანდელი თქვენი გადაწყვეტილება ძალიან ემოციურია პირადად ჩემთვის. მინდა, მადლობა გითხრა 2006 წელს დაწყებული ბრძოლისა და თანამებრძოლობისთვის. ისტორიაში ერთხელ ხდება ასეთი უთანასწორო ბრძოლა და ჩვენ ვიბრძოდით მხოლოდ ერთი რამისთვის – სამართლიანობისთვის. ეს იყო რეჟიმთან ბრძოლა, რა დროსაც ვერ ვიფიქრებდით, რომ ერთ დღეს იუსტიციის უმაღლესი საბჭო მოსამართლეთა იმ სიას წარმოადგენდა, ვინც ჩვენს თანამებრძოლებს ასამართლებდა. ეს გაუგებარი და ნონსენსია. ამიტომ მქონდა მე და ჩვენი ფრაქციის ყველა წევრს ასეთი მძაფრი რეაქცია. ძალიან დიდი ყურადღებით ველოდებით იუსტიციის უმაღლესი საბჭოს მორიგ გადაწყვეტილებას, ეს ჩემთვის ბევრის მაჩვენებელი იქნება.
რა თქმა უნდა, ეკა ბესელიაზე კარგად ვერავინ დაიცავს სამართლებრივ ნორმებსა თუ რეგლამენტს, მაგრამ, როგორც ძველ თანამებრძოლს, მინდა გთხოვოთ, დღეს რადგან ასეთი მოცემულობაა, კომიტეტმა არ მიიღოს ისეთი გადაწყვეტილება, რაც საზოგადოებაში უნდობლობას გამოიწვევს. მართლმსაჯულება ეყრდნობა ყველაზე მთავარ ფუნდამენტს, ეს არის ნდობა. დარწმუნებული ვარ, ქალბატონი ეკა ბოლომდე კლდესავით დადგება, რომ მაქსიმალურად გააუმჯობესოს სამართლებრივი სივრცე,“ – განაცხადა ბიძინა გეგიძემ.