ჯანდაცვის მინისტრმა დავით სერგეენკომ საქართველოში გრიპის ვირუსის გავრცელების მაჩვენებელთან დაკავშირებით სტატისტიკა მოიყვანა.
როგორც ირკვევა 2009 წელს გრიპის ვირუსის ავადობის პიკი იყო, კერძოდ მაშინ 100 000 მოსახლეზე დაავადებულთა რაოდენობა 1 550 ადამიანი იყო.
რაც შეეხება შემდეგ წლებს, 100 000 მოქალაქეზე ავადობის მაჩვენებლები ასეთი იყო:
2011-2012 წლებში იყო 490; 2012-2013 წლებში – 384; 2013-2014 წლებში იყო 480; 2015-2016 წლებში 257; 2016-2017 წლებში – 400; 2017-2018 წელს – 196 და დღეს გვაქვს 256.
ჯანდაცვის მინისტრის თქმით, ეს ციფრები ნიშნავს იმას, რომ დღევანდელი მდგომარეობა უნიკალური არ არის.
რაც შეეხება გრიპის ვირუსით გარდაცვალების ფაქტებს, “რადიო თავისუფლება” დაავადებათა კონტროლის ეროვნული ცენტრის მონაცემებზე დაყრდნობით ბოლო 10 წლის შედეგებს აჯამებს.
2009-2010 წლებში გრიპის ვირუსით 33 ადამიანი გარდაიცვალა; 2010-2011 წლებში – 53 ადამიანი; 2011-2012 წლებში 5 ადამიანი; 2012-2013 წლებში – 23 ადამიანი; 2013-2014 წლებში – 9 ადამიანი; 2014-2015 წლებში – 10 ადამიანი; 2015-2016 წლებში 50 ადამიანი; 2016-2017 წლებში 6 ადამიანი; 2017-2018 წლებში 2 ადამიანი; 2018-2019 წლებში კი ბოლო მონაცემებით გრიპის ვირუსით 13 ადამიანი გარდაიცვალა.
დღესვე ჯანდაცვის მინისტრმა ფარმაკოლოგიურ კომპანიებს მოუწოდა, რომ გამოიჩინონ პასუხისმგებლობა და შეძლებისდაგვარად ანტივირუსული პრეპარატის “ტამიფლუს” ფასი დაწიონ. საქართველოს მასშტაბით ანტივირუსული პრეპარატის “ტალიმფუს” მარაგები აფთიაქებში 11 იანვრიდან შეივსება.