ლევან იზორია: მთავრობის დამსახურებაა, რომ საქართველოს მოსახლეობის უმრავლესობას ნატო-ში ინტეგრაცია სურს

“ჩვენი მთავრობის ძალისხმევის დამსახურებაა ის, რომ საქართველოს მოსახლეობის უმრავლესობას სურს ნატო-ში ინტეგრაცია და ამაში, რა თქმა უნდა, ჩვენი უწყების მოკრძალებული წვლილიც არის”, – ამის შესახებ საქართველოს თავდაცვის მინისტრმა, ლევან იზორიამ NDI-ის კვლევის იმ ნაწილის შედეგებზე კომენტარისას განაცხადა, რომელიც ნატო-ში საქართველოს ინტეგრაციის საკითხს ეხება.
მინისტრი იმედოვნებს, რომ აღნიშნული რიცხვი მომავალში უფრო გაიზრდება.
„გვახარებს ფაქტი, რომ ეს მზარდია. დარწმუნებული ვარ, მომავალში უფრო მზარდი იქნება. მით უფრო – ეთნიკური უმცირესობების ფარგლებშიც. ამის საფუძველს მაძლევს ის გარემოებაც, რომ ჩვენ, მაგალითად 2018 წელს, შემოვიღეთ ახალი სისტემა, როდესაც ჩვენი თანამოძმენი – აზერბაიჯანელი და სომეხი თანამოძმენი, წვევამდელების სახით საკუთარ ენაზე ეცნობიან გაზეთებს, ინფორმაციას იმასთან დაკავშირებით, რა რეფორმებს ვახორციელებთ, რა არის ჩვენი სტრატეგიული მიზნები. ეს მცირე მაგალითიც ცხადყოფს, რომ ამ სტრატეგიული მიზნის გარშემო მოსახლეობის ინტეგრაცია, მით უფრო ეთნიკური უმცირესობების, არის სასიცოცხლოდ მნიშვნელოვანი და სწორედ ამ მიმართულებით, როგორც უწყების ფარგლებში, ისე, რა თქმა უნდა, სტრატეგიული კომუნიკაციის დონეზე, არის მნიშვნელოვანი ნაბიჯები გადადგმული“, – განაცხადა ლევან იზორიამ.
ცნობისთვის, ეროვნულ-დემოკრატიული ინსტიტუტის (NDI) კვლევის შედეგების მიხედვით, გამოკითხულთა 78%-თვის საქართველოს მთავრობის გაცხადებული მიზანი, რომ გახდეს ნატო-ს წევრი მისაღებია.
კითხვაზე – მისაღებია თუ არა საქართველოს მთავრობის გაცხადებული მიზანი, საქართველო გახდეს ნატო-ს წევრი – 78% პასუხობს, რომ მისაღებია, 13% თვის მიუღებელია, ხოლო კითხვაზე პასუხი „არ ვიცი“ 9%-მა გასცა.