უმრავლესობის ლიდერი არჩილ თალაკვაძე ამბობს, რომ „ქართული ოცნება“ კრიზისში არ არის და ისინი უბრალოდ რთული ცვლილებების პროცესში არიან. ამასთან დაკავშირებით თალაკვაძემ „ქრონიკასთან“ ილაპარაკა.
„ქართული ოცნების საპარლამენტო უმრავლესობა არ იშლება და ქართული ოცნება 2020 წლამდე შეინარჩუნებს პარლამენტში უმრავლესობას. დეპუტატების გასვლით, რა თქმა უნდა, აღარ გვაქვს საკონსტიტუციო უმრავლესობა, თუმცა თავიდანვე საკონსტიტუციო უმრავლესობა არ იყო თვითმიზანი, ეს იყო შედეგი და იყო საშუალება რომ განგვეხორციელებინა რეფორმები“, – განაცხადა არჩილ თალაკვაძემ.
თალაკვაძის თქმით, პარტიიდან ეკა ბესელიას წასვლით, ოპოზიციურ ძალებს სერიოზული კონკურენტი გამოუჩნდა. „ჩვენთან ერთად მეტი სანერვიულო გაუჩნდა ოპოზიციას. ეკა ბესელია არის ძლიერი ქალი პოლიტიკოსი და მისი გადასვლა დამოუკიდებელი დეპუტატის რანგში, ეს ნიშნავს იმას, რომ ის ოპოზიციას წაართმევს დროს და სიტყვას“, – აღნიშნა არჩილ თალაკვაძემ.