„გამორიცხულია ამ ორი მოვლენების ერთმანეთთან დაკავშირება“, – ეს კომენტარი ფინანსთა მინისტრმა, ივანე მაჭავარიანმა “თიბისი” ბანკსა და ანაკლიის პორტის პროექტზე საუბრისას გააკეთა.
„გამორიცხულია ამ ორი მოვლენების ერთმანეთთან დაკავშირება. ეს ე.წ. “თიბისის”-თან დაკავშირებული კითხვის ნიშნები, რომლებიც მოგვარდა, არ იყო “თიბისის”-თან დაკავშირებული, ეს იყო რაღაც კონკრეტულ ტრანზაქციაზე. მე მგონი მოგვარებულია, “თიბისი”-მ ჯარიმა გადაიხადა, ეროვნული ბანკის მოთხოვნები სრულად დაკმაყოფილდა. თქვენ რომ ნახოთ ლონდონის საფონდო ბირჟაზე რა მოხდა, ნახავთ, რომ “თიბისი”-ს აქციები არა თუ დაუბრუნდა თავდაპირველ ნიშნულს, არამედ უფრო გაიზარდა. ეს კიდევ ერთხელ ადასტურებს, რომ ეს ინსტიტუცია არის მყარი. მე დარწმუნებული ვარ, რომ ანაკლიასთან დაკავშირებული ყველა გადაწყვეტილება, ყველა არსებული თუ პოტენციური ინვესტორის იქნება მხოლოდ და მხოლოდ დაფუძნებული იმაზე, თუ რამდენად მომგებიანი და მიზანშეწონილია ეს პროექტი,“ – განაცხადა ივანე მაჭავარიანმა.
ხვალ, 26 თებერვალს მამუკა ხაზარაძეს და ბადრი ჯაფარიძეს პარლამენტში ელოდებიან. ამავე საქმეზე სავარაუდოდ, ხვალვე მოუწევს ახსნა განმარტებების გაკეთება ეროვნული ბანკის პრეზიდენტსაც.